Վրաստանի գործերի ժամանակավոր հավատարմատարին Մոլդովայի ԱԳՆ են կանչել Կոբախիձեի խոսքերի պատճառով

Մոլդովայի արտաքին գործերի նախարարությունը կանչել է Քիշնևում Վրաստանի գործերի ժամանակավոր հավատարմատար Դավիլա Բոչորիշվիլիին Վրաստանի վարչապետ Իրակլի Կոբախիձեի՝ Մոլդովայի նախագահական ընտրությունների խախտումները հետաքննելու վերաբերյալ հայտարարության պատճառով։ Գերատեսչությունը դժգոհություն է հայտնել Կոբախիձեի «խեղաթյուրված և անհամապատասխան» հայտարարություններից։

«Ցանկանում ենք նշել, որ Մոլդովայի Հանրապետության և Վրաստանի միջև համագործակցության և ավանդական բարեկամության հարաբերությունները, ինչպես նաև այն նպատակները, որոնք մեր պետություններից յուրաքանչյուրը հետապնդում է եվրաինտեգրման գործընթացում, պետք է գերակայեն», – ասված է Մոլդովայի ԱԳՆ հայտարարությունում։

Անցյալ շաբաթ Բուդապեշտում Եվրոպական քաղաքական համայնքի գագաթնաժողովի շրջանակում Իրակլի Կոբախիձեն եվրոպացի առաջնորդներին մեղադրել է երկակի ստանդարտների մեջ՝ պահանջելով հետաքննել Վրաստանում խորհրդարանական ընտրություններում կեղծիքները: Նրա խոսքով, Մոլդովայի նախագահական ընտրությունների ժամանակ «շատ ավելի շատ խախտումներ են եղել»։ Նախօրեին, վերադառնալով այս թեմային, նա հայտարարել էր, որ եթե հետաքննություն պետք է իրականացվի, ապա դա պետք է լինի Մոլդովայում։

Մոլդովայում նախագահական ընտրությունների առաջին փուլը կայացել է հոկտեմբերի 20-ին, երկրորդը՝ նոյեմբերի 3-ին։ Նախագահ Մայա Սանդուն հաղթել է ձայների 55,33%-ով, մինչդեռ ընդդիմությունը չի ճանաչել դրանց արդյունքները։ Հոկտեմբերի 26-ին Վրաստանում տեղի ունեցան խորհրդարանական ընտրություններ, որոնց արդյունքներով հաղթել է իշխող «Վրացական երազանքը»։ Ընդդիմությունը բազմաթիվ խախտումներ է արձանագրել։ Հետաքննություն անցկացնելու կոչ են արել նաև ԵՄ երկրները։

Թարգմանությունը՝ Տաթև Ֆռանգյանի