11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Թուրքիան ճնշում է ԱՄՆ-ին՝ վերանայելու Սիրիայում քրդերի հետ դաշինքը
Քաղաքականություն
11.11.2024 | 22:51
Թուրքիան ճնշում է գործադրում Միացյալ Նահանգների վրա՝ վերանայելու Վաշինգտոնի աջակցությունը Սիրիայում քուրդ զինյալներին՝ համաձայն իր առաջնորդների, այդ թվում՝ նախագահ Ռեջեփ Թայիփ Էրդողանի մեկնաբանությունների։ Անկարան կրկին բարձրաձայնել է նոր անդրսահմանային հարձակման հավանականության մասին, գրում է Reuters-ը, որին վկայակոչում է Arab news-ը։
«Մենք մշտապես հիշեցնում ենք մեր ամերիկացի գործընկերներին, որ նրանք պետք է դադարեցնեն համագործակցությունը Սիրիայում ահաբեկչական կազմակերպության հետ։ Մեր շփումներն այս հարցով ավելացել են։ Մենք տեսնում ենք, որ ամերիկյան կողմը նույնպես ձգտում է ավելի շատ զրույցների և բանակցությունների», – ասել է Թուրքիայի արտգործնախարար Հաքան Ֆիդանը Milliyet-ին տված հարցազրույցում։
Կիրակի Էրդողանը հայտարարել է, որ Թուրքիան կարող է նոր հարձակում իրականացնել Սիրիայի հյուսիսում՝ իր սահմանի երկայնքով նոր անվտանգ գոտիներ ստեղծելու համար։ Ուրբաթ էլ նա հայտարարել էր, որ Սիրիայից ամերիկյան զորքերի հնարավոր դուրսբերման հարցը կքննարկի ԱՄՆ նորընտիր նախագահ Դոնալդ Թրամփի հետ:
ԱՄՆ-Թուրքիա հարաբերությունների լարվածությունը ներառում է ԱՄՆ աջակցությունը սիրիական քրդական YPG-ին, որը Վաշինգտոնի գլխավոր դաշնակիցն է Սիրիայում «Իսլամական պետություն» ահաբեկչական խմբավորման դեմ պայքարում։
Թուրքիան վերջին տարիներին մի քանի անդրսահմանային գործողություններ է իրականացրել YPG-ի դեմ։
Էրդողանը կիրակի օրվա ելույթում ասել է, որ այդ քայլերը Սիրիայում ստեղծել են անվտանգ գոտիներ, որոնք «կանխել են իր հարավային սահմաններից շրջապատելու փորձերը», և Թուրքիան վճռական է «ամբողջովին դադարեցնել կապերը ահաբեկչական կազմակերպությունների միջև»:
Թարգմանությունը՝ Էմմա Չոբանյանի
