Գրետա Թունբերգը Թբիլիսիում բողոքի ցույցի է հրավիրում Բաքվում COP29-ի անցկացման, ավտորիտարիզմի և պատերազմի դեմ

Կլիմայական հարցերով հայտնի ակտիվիստ Գրետա Թունբերգը Թբիլիսիում նոյեմբերի 11-ին տեղի ժամանակով 19։0-ին հրավիրում է բողոքի ցույցի՝ ընդդեմ Բաքվում COP29-ի անցկացման, ավտորիտարիզմի, պատերազմի, կապիտալիստական ​​շահագործման։

«Միացե՛ք մեզ՝ ընդդեմ ավտորիտարիզմի և շահագործման ալիքի, որը տարածվում է Կովկասով: Ադրբեջանը, օգտագործելով COP29-ը որպես շղարշ, խստացնում է կեղծ կանաչ օրակարգը, ուժեղացնում է իր իշխանությունը և սրում տարածաշրջանային լարվածությունը։ Ավելի քան 20 տարի Ալիևի գլխավորած Ադրբեջանի ռեժիմը  ճնշված է պահել մարդկանց՝ խթանելով աղքատությունը, վախը և լռությունը։ Այս ավտորիտար միտումը մեկուսացված չէ. ողջ տարածաշրջանում մարդիկ, ինչպիսիք են Իվանիշվիլին, Պուտինը, Էրդողանը, Իրանի թեոկրատական ​​ռեժիմը, խորացնում են վերահսկողությունը, խեղդում այլախոհությունը, ճնշում սեփական ժողովրդին և օգտագործում են պատերազմն ու էթնիկ զտումները հայերի, ուկրաինացիների, քրդերի և այլ էթնիկ փոքրամասնությունների դեմ՝ արդարացնելու դաժան քաղաքականությունը»,- մասնավորապես գրել է Թունբերգը X-ում։

Ակտիվիստուհին նշել է, որ հավաքական Արևմուտքի դերն այս ավտորիտար տեղաշարժում անհերքելի է, քանի որ այն շարունակում է լեգիտիմացնել և ֆինանսավորել ճնշող վարչակարգերը՝ հանուն էներգիայի և շահույթի:

«Ռեսուրսների դիմաց աչք փակելով ճնշումների վրա՝ արևմտյան տերությունները մեղսակից են Կովկասի ժողովրդի առջև ծառացած բռնաճնշումներին և տառապանքներին: Կովկասյան ֆեմինիստական ​​հակապատերազմական շարժումը պահանջում է ավտորիտարիզմի, պատերազմի և կապիտալիստական ​​ագահությունից զերծ ապագա: Մենք հանդես ենք գալիս իրական ազատության, հավասարության, արդարության և տարածաշրջանի օգտին, որտեղ առաջին տեղում մարդիկ են, այլ ոչ թե շահերը»,- նշել է Թունբերգը։

Հիշեցնենք, որ ավելի վաղ Թբիլիսիում բողոքի ցույցի ժամանակ Գրետա Թունբերգը հայտարարել էր, որ չի մասնակցելու Բաքվում կայանալիք ՄԱԿ-ի կլիմայական համաժողովին՝ ընդգծելով, որ Ադրբեջանի ռեժիմը պատասխանատու է հայերի էթնիկ զտման համար։

Թարգմանությունը՝ Էմմա Չոբանյանի