08.10.2026 | 15:48
«Գութանասար» հրաբխի «Սև պատ» կոչվող հատվածը վերադարձվել է համայնքի տիրապետմանը
Շոլցը չեղարկել է Բաքու այցը՝ Գերմանիայում քաղաքական լարվածության պատճառով․ Bloomberg
Քաղաքականություն
07.11.2024 | 21:31
Գերմանիայի կանցլեր Օլաֆ Շոլցը չեղարկել է այցը ՄԱԿ-ի կլիմայի փոփոխության հարցերով COP29 կոնֆերանսին, որը կկայանա նոյեմբերի 11-22-ը Բաքվում՝ երկրում քաղաքական լարվածության պատճառով։ Այս մասին հայտնում է Bloomberg-ը՝ հղում անելով իր աղբյուրներին։
Ըստ գործակալության՝ Շոլցը պետք է մասնակցեր COP29-ին, սակայն հրաժարվել է այս ծրագրից՝ Գերմանիայում իրավիճակը կայունացնելու համար։ Նշվում է, որ համաժողովին չեն կարողանա մասնակցել նաև Եվրահանձնաժողովի ղեկավար Ուրսուլա ֆոն դեր Լեյենը և Ֆրանսիայի նախագահ Էմանուել Մակրոնը։
Գերմանիայում սուր քաղաքական ճգնաժամ է բռնկվել կոալիցիայում բյուջետային, ֆինանսական և տնտեսական քաղաքականության շուրջ տարաձայնությունների պատճառով, այդ թվում, այսպես կոչված, պարտքային արգելակի թուլացման հարցում (օրենք, որն արգելում է ավելի շատ գումար ծախսել բյուջեից, քան մուտք է արվում):
Արդյունքում Շոլցը որոշել է պաշտոնանկ անել ֆինանսների նախարար Քրիստիան Լինդներին (Ազատ դեմոկրատական կուսակցություն, FDP): Նա նաև հայտարարել է, որ ցանկանում է 2025 թվականի հունվարի 15-ին Բունդեսթագում բարձրացնել իր կառավարությանը վստահության հարցը։
Եթե պատգամավորները հրաժարվեն վստահություն հայտնել, ապա, ըստ օրենքի, նախագահը պետք է ցրի խորհրդարանը 21 օրվա ընթացքում։ Բունդեսթագի լուծարումից հետո 60 օրվա ընթացքում նոր ընտրություններ պետք է անցկացվեն։
Թարգմանությունը՝ Տաթև Ֆռանգյանի
