18.07.2026 | 15:40
Սպանությանն օժանդակող 2 ոստիկանները կալանավորվել են․ՔԿ
Հայաստանի քաղաքացիները կկարողանան առանց վիզայի մեկնել Մոնղոլիա
Քաղաքականություն
07.11.2024 | 13:47
Կառավարությունը չզեկուցվող հարցով հավանություն տվեց «Հայաստանի և Մոնղոլիայի կառավարությունների միջև դիվանագիտական և պաշտոնական անձնագրեր ունեցող անձանց մուտքի արտոնագրի պահանջից ազատելու մասին» համաձայնագրում փոփոխությունների առաջարկությանը:
Ըստ կառավարության հիմնավարման՝ փոփոխության նպատակն է՝ յուրաքանչյուր կողմի պետության՝ սովորական վավեր անձնագրեր ունեցող քաղաքացիներին ազատել միմյանց տարածք մուտքի, ելքի, տարանցման և կացության արտոնագրի պահանջից՝ մուտք գործելու օրվանից 30 օրը չգերազանցող ժամկետով:
Ըստ հիմնավորման՝ այս համաձայնագիրը ուժի մեջ է մտել 2019թ.հունիսի 2-ին:
«Մոնղոլական կողմից առաջարկ է ստացվել լրացումներ կատարել վերոհիշյալ համաձայնագրի մեջ՝ մուտքի արտոնագրի պահանջից ազատելով նաև սովորական անձնագիր ունեցող անձանց: Այս կապակցությամբ հարկ է նշել, որ ներկա պահին Մոնղոլիայից Հայաստան այցելող զբոսաշրջիկների թիվը մեծ չէ և սովորական անձնագրերով անձանց համար ՀՀ մուտքի արտոնագրի պահանջը վերացնելու շուրջ փոփոխություններ ենթադրող Արձանագրության կնքումը կարող է որոշակի խթան հանդիսանալ երկկողմ զբոսաշրջային փոխանակումների ընդլայնման համար, ինչպես նաև որոշակիորեն նպաստել երկկողմ գործարար կապերի զարգացմանը» ,- ասված է հիմնավորման մեջ։
Կառավարության հիմնավորման մեջ նաև ասվում է, որ Հայաստանի և Մոնղոլիայի միջև դիվանագիտական հարաբերությունների հաստատումից ի վեր երկկողմ կապերը շատ դանդաղ են զարգացել: Միաժամանակ, առկա է հարաբերությունների զարգացման որոշակի ներուժ: Քաղաքական երկխոսությունը հիմնականում ընթանում է դեսպանների հավատարմագրման շրջանակներում անցկացվող հանդիպումների, ինչպես նաև միջազգային հարթակներում ԱԳ նախարարների կամ այլ պաշտոնյաների միջև շփումների միջոցով:
