30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
«Դոմոդեդովո»-ում ՀՀ քաղաքացի է ձերբակալվել, որին ռուսական կողմը «վարձկանության» մեջ է մեղադրում
Քաղաքականություն
06.11.2024 | 14:20
Մոսկվայի «Դոմոդեդովո» օդանավակայանում ձերբակալվել է ՀՀ քաղաքացի Արմեն Բալյանը, որը, ռուսական կողմի պնդմամբ, եղել է «վարձկան և կռվել է Ուկրաինայի զինված ուժերի կողմից»։ Այս մասին ՌԻԱ Նովոստիին հայտնել են Քննչական կոմիտեի մամուլի ծառայությունից։
«2024 թվականի հոկտեմբերին Արմեն Բալյանը ձերբակալվել է «Դոմոդեդովո» օդանավակայանում՝ Ռուսաստանի Դաշնության տարածք մուտք գործելու փորձ կատարելիս»,- նշել են գերատեսչությունում։
Նա հետախուզվում էր օգոստոսից, երբ հեռակա մեղադրանք էր առաջադրվել վարձկան լինելու համար։
Հետաքննության պնդմամբ՝ Բալյանը 2022 թվականի նոյեմբերին Մոլդովայի հետ սահմանով ժամանել է Ուկրաինա և մինչև 2023 թվականի դեկտեմբերը գումարի դիմաց մասնակցել ռազմական գործողությունների Դոնեցկում և Լուգանսկում, ինչպես նաև Խերսոնի մարզում։
Նշվում է, որ ձերբակալությունից հետո հարցաքննության ժամանակ Բալյանը, իբր, տվել է սպառիչ ցուցմունքներ և ընդունել մեղքը։ Մեղադրյալն ասել է, որ մի քանի վնասվածքներ է ստացել, ինչպես նաև հաստատել է «քննությամբ բացահայտված փաստերը»։
Թարգմանությունը՝ Տաթև Ֆռանգյանի
