Ադրբեջանի Մեջլիսի նախագահն ու Բաքվում ՌԴ դեսպանը Եվրախորհրդարանի «հակաադրբեջանական գործողություններն» են քննարկել

Ադրբեջանի Միլլի Մեջլիսի նախագահ Սահիբ Գաֆարովան Բաքվում ՌԴ դեսպան Միխայիլ Եվդոկիմովի հետ հանդիպմանը գոհունակություն է հայտնել երկու երկրների միջև բարձր մակարդակի հարաբերությունների զարգացման կապակցությամբ։ Կողմերը նշել են պետությունների ղեկավարների փոխայցելությունների նշանակալի դերն այդ կապերի ընդլայնման գործում։

Տեղական լրատվամիջոցների փոխանցմամբ՝ քննարկվել են նաև COP29-ի նախապատրաստական ​​աշխատանքները։ Հաղորդվել է, որ Ռուսաստանի Դաշնությունը բարձր մակարդակով կմասնակցի ինչպես COP29-ին, այնպես էլ Խորհրդարանական համաժողովին, որը կանցկացվի դրա շրջանակում: Ընդգծվել է միջազգային այս կարևոր իրադարձությունը քաղաքականացնելու փորձերի անթույլատրելիությունը։

Հանդիպմանը կողմերը նաև իրենց դժգոհություններն են հայտնել Եվրախորհրդարանից։ Զրույցի ընթացքում «քննադատության են ենթարկվել Եվրախորհրդարանի կողմից Ադրբեջանի վերաբերյալ ընդունված կողմնակալ փաստաթղթերը, ինչպես նաև այս կազմակերպության հակաադրբեջանական գործողությունները»։

«Միլի Մեջլիսի նախագահ Սահիբա Գաֆարովան հայտարարել է, որ Եվրախորհրդարանի քայլերը չեն համապատասխանում պառլամենտարիզմի ոգուն, և որ մեր երկիրը կտրականապես մերժում է իրականությունը խեղաթյուրող, կողմնակալ և միակողմանի բանաձևերը։ Նա ընդգծել է խորհրդարանների միջև հարաբերություններում օբյեկտիվ կարծիքների և երկխոսության անհրաժեշտությունը»,- ասվում է հայտարարության մեջ։

Հիշեցնենք, որ ավելի վաղ Միլլի Մեջլիսը դատապարտել էր Ադրբեջանի վերաբերյալ Եվրախորհրդարանի ընդունած բանաձևը։

Թարգմանությունը՝ Էմմա Չոբանյանի