07.10.2026 | 19:34
«Բրա՛վո»․ Նիկոլ Փաշինյանն ընդդիմադիրների հետ ծափահարեց իր մոտալուտ հրաժարականի մասին դիտարկմանը. ՏԵՍԱՆՅՈՒԹ
Վրաստանի ընդդիմությունը հրաժարվել է համագործակցել դատախազության հետ ընտրակեղծիքների հետաքննության շրջանակում
Քաղաքականություն
30.10.2024 | 16:10
Վրացական ընդդիմադիր կուսակցությունների ներկայացուցիչները լրագրողներին ասել են, որ հրաժարվում են համագործակցել երկրի դատախազության հետ խորհրդարանական ընտրություններում հնարավոր կեղծիքների հետաքննության շրջանակում և պահանջում են, որ այդ գործընթացով զբաղվի միջազգային հանրությունը։
Այսօր ավելի վաղ Վրաստանի դատախազությունը հայտարարել էր, որ երկրի Կենտրոնական ընտրական հանձնաժողովի դիմումի հիման վրա հետաքննություն է սկսել հոկտեմբերի 26-ի խորհրդարանական ընտրություններում հնարավոր կեղծիքների վերաբերյալ։ Գերատեսչությունը հայտարարել է, որ մտադիր է հարցաքննել բոլորին, ովքեր կարող են տեղեկություններ ունենալ խախտումների մասին, սակայն Վրաստանի նախագահ Սալոմե Զուրաբիշվիլին առաջիններից էր, որը կանչվել է հարցաքննության։ Նրան սպասում են գերատեսչությունում հոկտեմբերի 31-ին։
Հիշեցնենք, որ Վրաստանի ընդդիմությունը չի ճանաչում ընտրությունների արդյունքները՝ պնդելով, որ դրանք կեղծվել են, և հրաժարվում է խորհրդարան մտնել։
«Վրաստանի դատախազությունը ո՛չ լավ համբավ ունի, ո՛չ վստահություն, ուստի այս գերատեսչությունը չի կարող օբյեկտիվորեն հետաքննել ընտրակեղծիքների փաստերը»,- «Գրուզիա օնլայն»-ի փոխանցմամբ՝ ասել է «Ուժեղ Վրաստանի» առաջնորդ Բադրի Ջափարիձեն:
Նա հավելել է, որ հետաքննությունը պետք է վարի միջազգային հեղինակություն ունեցող անկախ կազմակերպություն։
«Ի՞նչն է խանգարում ԵՄ համապատասխան ստորաբաժանմանը, որն ընտրակեղծիքների հետ կապված հետաքննություններ վարելու փորձ ունի, անցկացնել այս հետաքննությունը։ Դրանից ստացած տեղեկատվությունն առավելագույնս հավաստի կլինի»,- ասել է Ջափարիձեն։
Թարգմանությունը՝ Տաթև Ֆռանգյանի
