30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Կիևում ռուսական ԱԹՍ-ների հարձակման հետևանքով 9 մարդ է տուժել
Քաղաքականություն
30.10.2024 | 14:26
Հոկտեմբերի 30-ի գիշերը ռուսական կողմն անօդաչու թռչող սարքերով հարձակվել է Կիևի վրա։ Կիևի քաղաքային ռազմական վարչակազմի ղեկավար Սերգեյ Պոպկոյի տեղեկացմամբ՝ հոկտեմբերին սա արդեն 19-րդ հարձակումն է Ուկրաինայի մայրաքաղաքի վրա։ Այս գիշեր օդային տագնապը տևել է ավելի քան երկու ժամ, փոխանցում է Current Time-ը։
ՀՕՊ համակարգերը, ըստ Պոպկոյի, խոցել են բոլոր անօդաչու թռչող սարքերը։
«Ռուսական անօդաչուները չեն փոխել իրենց մշտական մարտավարությունը․ դրանք մայրաքաղաքին մոտեցել են տարբեր կողմերից, տարբեր բարձրություններից։ Հակառակորդի անօդաչու թռչող սարքերը ժամանակին հայտնաբերվել և վնասազերծվել են հակաօդային պաշտպանության ուժերի և տեխնիկայի կողմից»,- նշել է պաշտոնյան։
Խոցված անօդաչուներից մեկի բեկորներն ընկել են Կիևի Սոլոմենսկի շրջանում։ Արդյունքում հրդեհ է բռնկվել բազմահարկ շենքի մի քանի բնակարաններում, 18 մարդ տարհանվել է։ Տուժել է 9 մարդ, այդ թվում՝ երեխա։
Նույն տարածքում հրդեհվել է վարչական շենք։ Հրդեհն արագ մարվել է, տուժածներ չկան, հավելել է Պոպկոն։
Ավելի ուշ Կիևի իշխանությունները պարզաբանել են, որ վնասվել է նաև մանկապարտեզի շենքը։
Նախորդ գիշեր Սոլոմենսկի թաղամասում անօդաչու թռչող սարքի հարձակման պատճառով հրդեհվել էին կայանված մեքենաներ, խանութ և առևտրային շենք։ 5 մարդ վիրավորվել էր, 15-ը՝ տարհանվել։
Թարգմանությունը՝ Տաթև Ֆռանգյանի
