30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Առաջիկայում կավարտվի Իգդիր-Նախիջևան գազատարի շինարարությունը
Քաղաքականություն
30.10.2024 | 14:44
Առաջիկա օրերին նախատեսվում է ավարտել Իգդիր-Նախիջևան գազատարի շինարարությունը։ Այս մասին Նախիջևանում Թուրքիայի Հանրապետության 101-րդ տարեդարձի առթիվ կազմակերպված միջոցառմանը լրագրողների հետ զրույցում ասել է Թուրքիայի գլխավոր հյուպատոս Ասիպ Քայան։
Նա նշել է, որ Թուրքիայի կապերն Ադրբեջանի, մասնավորապես, Նախիջևանի հետ օրեցօր ընդլայնվում են։
«Մենք պարբերաբար աշխատում ենք Թուրքիայի և Նախիջևանի միջև կապերի ընդլայնման ուղղությամբ, մեծ աշխատանք է կատարվել, և դա կշարունակվի ապագայում։ Թուրքիան միշտ Ադրբեջանի կողքին է։ Ինչպես գիտեք՝ անցած տարվա սեպտեմբերին երկու երկրների նախագահների մասնակցությամբ կատարվել է Իգդիր-Նախիջևան գազատարի հիմնարկեքը։ Ակնկալվում է, որ շինարարությունը կավարտվի առաջիկա օրերին»,- նշել է դիվանագետը։
Նշենք, որ դեռևս 2020 թվականի դեկտեմբերին Թուրքիան և Ադրբեջանը հուշագիր էին ստորագրել Իգդիր-Նախիջևան գազատարի կառուցման վերաբերյալ, որն իրականացնում են Ադրբեջանի պետական նավթային SOCAR և թուրքական պետական գազային BOTAŞ ընկերությունները։ Թուրքիայի տարածքում գազատարի երկարությունը կազմելու է մոտ 85 կմ։
Ըստ տարբեր տեղեկությունների՝ գազամուղի թողունակությունը 2 մլրդ մ³ է, որը 4 անգամ գերազանցում է Նախիջևանի պահանջարկը։ Նախիջևանն այս պահին իրանական գազ է ստանում 2004 թվականին Բաքվի ու Թեհրանի միջև կնքված փոխանակման համաձայնագրով, ըստ որի՝ Ադրբեջանը գազ է մատակարարում Իրանի Աստարա քաղաք, որն իրանական գազամատակարարման ցանցին միացած չէ։ Դրա դիմաց Իրանը գազ է մատակարարում Նախիջևանին ամբողջ ծավալի 85 տոկոսի չափով, իսկ 15 տոկոսը տարանցման վճարն է։
Թուրքիան իր հերթին գազ է ստանում Իրանից։ Իգդիր-Նախիջևան գազատարը Թուրքիան ցանկանում է օգտագործել Իրանի հետ բանակցություններում՝ տարբեր հարցերում իր համար ձեռնտու լուծումներ ստանալու համար։
Թարգմանությունը՝ Էմմա Չոբանյանի
