21.11.2024 | 13:56
Ապրիլից Արցախից բռնի տեղահանվածների աջակցության ծրագրից կօգտվեն թիրախային խմբերը
Ռազմաճակատը փլուզվում է․ ռուսական բանակը Դոնբասում երեք օրում 8 բնակավայր է գրավել․ Bild-ի փորձագետ
Քաղաքականություն
28.10.2024 | 19:27
Վերջին երեք օրվա ընթացքում ռուսական զորքերը վերահսկողության տակ են վերցրել ուկրաինական ութ բնակավայրեր՝ Բոգոյավլենկա, Կատերինովկա, Իզմայլովկա, Ալեքսանդրոպլ, Գորնյակ, Սելիդովո, Շախտերսկոկե և Վիշնյովոյե: Այս մասին հայտնում է Bild-ի բաց տվյալների վերլուծության փորձագետ Յուլիան Ռյոպկեն։
«Դոնեցկի շրջանի հարավում գտնվող ճակատը փլուզվում է։ Տարածաշրջանային մասշտաբով մենք խոսում ենք օրական երկուսից հինգ կիլոմետր կորստի մասին։ Այս արագությամբ Ռուսաստանին մոտ վեց ամիս կպահանջվի Դնեպրոպետրովսկի մարզ հասնելու համար»,- գրել է նա X-ի իր միկրոբլոգում։
Միևնույն ժամանակ, ուկրաինական OSINT DeepState նախագիծը, որը կապված է Ուկրաինայի Պաշտպանության նախարարության հետ, հայտնել է, որ ռուսական զորքերը վերահսկում են Սելիդովի զգալի մասը, սակայն քաղաքը դեռևս ամբողջությամբ չի օկուպացվել։ DeepState-ը հաստատել է նաև Դոնեցկի մարզի Պոկրովսկի շրջանում Գորնյակի գրավումը։
Կրեմլամետ Shot տելեգրամ-ալիքի պնդմամբ՝ ռուսական ուժերը վերահսկողություն են հաստատել Սելիդովի տարածքի 80%-ի նկատմամբ։
Որոշ ռուս զինվորական բլոգերներ նույնպես հայտնում են, որ ռուսական բանակը մոտ է Գորնյակի մոտ գտնվող Կուրախովո քաղաքը գրավելուն։ Ուկրաինայի հրամանատարությունն առայժմ ձեռնպահ է մնում այս հայտարարությունները մեկնաբանելուց։
Վերջին մի քանի ամիսների ընթացքում ռուսական բանակն ակտիվորեն փորձում էր առաջխաղացման հասնել Դոնեցկի շրջանում, և սեպտեմբերյան առաջխաղացումն այս շրջանում ամենանշանակալին էր պատերազմի ամբողջ ընթացքում։
Թարգմանությունը՝ Տաթև Ֆռանգյանի
