16.12.2025 | 22:27
Ըստ ՌԴ ԱԳՆ-ի՝ Արևմուտքն ակտիվացրել է «ապակառուցողական ջանքերը Հարավային Կովկասում»
Մեծ Բրիտանիան F-16 վարելու համար 200 ուկրաինացի օդաչուի է վերապատրաստել
Քաղաքականություն
23.10.2024 | 12:26
Մեծ Բրիտանիան 200 ուկրաինացի ռազմական օդաչուների է պատրաստել F-16 կործանիչներ վարելու համար, հայտարարել է թագավորության պաշտպանության փոխնախարար Լյուկ Փոլարդը։
«Այսօր ես ներկա էի Թագավորական ռազմաօդային ուժերի վերապատրաստման ծրագրի օդաչուների ավարտական արարողությանը: Այս օդաչուները շուտով կթռչեն ուկրաինական F-16-ներով»,- գրել է Փոլարդը X սոցիալական ցանցում:
Նա նաև ընդգծել է, որ Մեծ Բրիտանիան մտադիր է աջակցել Ուկրաինային «այնքան ժամանակ, որքան դա պահանջվի»:
Ուկրաինացի օդաչուների առաջին խումբը հիմնական վերապատրաստման ծրագիրը Մեծ Բրիտանիայում ավարտել է 2023 թվականի դեկտեմբերին։ Այնուհետև հաղորդվել է վեց փորձառու օդաչուների վերապատրաստման մասին, ևս տասը վերապատրաստվողներ մնացել են Բրիտանիայում՝ հիմնական թռիչքային և օդաբժշկական ուսուցման համար:
Ընդհանուր առմամբ, Ուկրաինայի դաշնակիցները 2023 թվականին տասնմեկ օդաչուի են պատրաստել F-16-ի համար: Դրանից հետո ԱՄՆ-ն արագացրել է փորձառու ուկրաինացի օդաչուների վերապատրաստման գործընթացը մինչև 6-ից 9 ամիս՝ կախված նրանց գիտելիքներից։ Դասընթացը կենտրոնացած է եղել կոնկրետ խնդիրների վրա, որոնք օդաչուները պետք է լուծեն ընթացիկ պատերազմի ժամանակ։
Միևնույն ժամանակ, ամերիկացի պաշտոնյաները The Wall Street Journal-ին հայտնել են, որ ուկրաինացի օդաչուները խնդիրներ են ունեցել F-16-ի անգլալեզու ձեռնարկն ուսումնասիրելիս, ոմանք էլ դիմադրել են ամերիկյան վարժանքների մեթոդներին: Դրա պատճառով հաճախ լարվածություն է առաջացել ՆԱՏՕ-ի երկրների հրահանգիչների և ուկրաինացիների միջև։
Թարգմանությունը՝ Տաթև Ֆռանգյանի
