23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Ուկրաինական ԱԹՍ-ները հարվածել են ՌԴ-ում մի քանի սպիրտի թորման ձեռնարկությունների․ ՏԵՍԱՆՅՈՒԹ
Քաղաքականություն
22.10.2024 | 11:39
ՌԴ իշխանությունները հայտնում են հոկտեմբերի լույս 22-ի գիշերը ուկրաինական անօդաչու թռչող սարքերի հարվածների մասին, որոնց հետևանքով վնասվել են մի քանի սպիրտի թորման արտադրամասեր, փոխանցում է Current Time-ը։
Տուլայի շրջանի նահանգապետ Դմիտրի Միլյաևը Տելեգրամում գրել է, որ վնասվել են Եֆրեմովսկի և Լուժկովսկի գյուղերի սպիրտի թորման գործարանները։
Նա նշել է, որ հակաօդային պաշտպանության ստորաբաժանումները հետ են մղել անօդաչու թռչող սարքերի հարձակումը։
Տամբովի մարզի ղեկավար Մաքսիմ Եգորովն իր հերթին հայտնել է, որ անօդաչու սարքը հարձակվել է Ռասկազովի «Բիոխիմ» ձեռնարկության վրա։ Պայթյունը գործարանում տեղի է ունեցել ժամը 05:20-ին։ Դեպքի վայրում հրդեհ է բռնկվել, որը մեկ ժամ անց մարվել է։ Ըստ նախնական տեղեկությունների՝ զոհեր և վիրավորներ չկան։
Վորոնեժի շրջանի նահանգապետ Ալեքսանդր Գուսևը հայտնել է անօդաչու թռչող սարքի հարձակումից հետո արդյունաբերական ձեռնարկությունում բռնկված հրդեհի մասին: Ըստ նրա՝ տուժածներ չկան, «ոչ մեծ հրդեհ» է առաջացել շենքի հարկերից մեկում։
Անօդաչու թռչող սարքի հարձակման սպառնալիքի պատճառով Նիժնի Նովգորոդի օդանավակայանում աշխատանքի ժամանակավոր սահմանափակումներ են մտցվել «քաղաքացիական ինքնաթիռների թռիչքների անվտանգությունն ապահովելու համար», հայտնում է Օդային տրանսպորտի դաշնային գործակալությունը։ Ավելի ուշ սահմանափակումները հանվել են։
Թարգմանությունը՝ Տաթև Ֆռանգյանի
