21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
Պուտինը «սադրանք» է անվանել Ուկրաինայի կողմից միջուկային զենք ստեղծելու մասին քննարկումները
Քաղաքականություն
18.10.2024 | 22:32
Մոսկվան «ոչ մի դեպքում» թույլ չի տա Կիևին միջուկային զենք ձեռք բերել, ասել է ՌԴ նախագահ Վլադիմիր Պուտինը։ Նա այսպես է մեկնաբանել Ուկրաինայի նախագահ Վլադիմիր Զելենսկիի հայտարարություններն այն մասին, որ Կիևը ձգտում է դառնալ ՆԱՏՕ-ի անդամ, քանի որ կամավոր հրաժարվել է միջուկային զենքից, սակայն այն երկրները, որոնք երաշխավորել են նրա անվտանգությունը, չեն կատարել իրենց խոստումները, փոխանցում է BBC-ի ռուսական ծառայությունը։
Պուտինն Ուկրաինայի կողմից միջուկային զենքի հնարավոր ստեղծման մասին շահարկումները «սադրանք» է անվանել։
«Այս ուղղությամբ ցանկացած քայլ կարժանանա համապատասխան արձագանքի»,- ասել է Պուտինը։
Միաժամանակ, նա նշել է, որ «ժամանակակից աշխարհում միջուկային զենք ստեղծելը դժվար չէ»։
«Ես չգիտեմ՝ արդյո՞ք Ուկրաինան կարող է դա անել հիմա, դա այնքան էլ հեշտ չէ Ուկրաինայի համար: Բայց, ընդհանուր առմամբ, այս առումով մեծ դժվարություններ չկան»,- ասել է Պուտինը։
Հոկտեմբերի 17-ին Եվրամիության գագաթնաժողովում ելույթ ունենալուց հետո Ուկրաինայի նախագահ Վլադիմիր Զելենսկին ասել է, որ սեպտեմբերի վերջին ԱՄՆ նախագահի թեկնածու Դոնալդ Թրամփի հետ հանդիպմանը քննարկել է երկրի անվտանգությունը երաշխավորելու տարբերակները։
«Կա՛մ Ուկրաինան միջուկային զենք կունենա, և դա մեզ համար պաշտպանություն կլինի, կա՛մ մենք պետք է ինչ-որ դաշինք ունենանք։ Բացի ՆԱՏՕ-ից՝ այսօր մենք չգիտենք որևէ արդյունավետ դաշինք»,- ասել է Զելենսկին։
Նա նաև ընդգծել է, որ Ուկրաինան ինքնակամ հրաժարվել է միջուկային զենքից, ուստի ընտրել է ՆԱՏՕ-ին անդամակցելը։
Թարգմանությունը՝ Տաթև Ֆռանգյանի
