08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Մտածել են՝ ահաբեկչություն է. ինչպես է բերման ենթարկվել անառակաբարո գործողությունների մեջ կասկածվող ուսուցիչը. ՏԵՍԱՆՅՈՒԹ
Հասարակություն
10.10.2024 | 21:15
Ոչ ոք չգիտի կամ չի ուզում խոսել Ջոն Կիրակոսյանի անվան թիվ 20 հիմնական դպրոցում այսօր տեղի ունեցածի մասին, քանի որ Երևանի քաղաքապետարանն է արգելել։ Կեսօրին Ազգային անվտանգության ծառայության աշխատակիցները ներխուժել են դպրոց և հենց դասի ժամանակ՝ երեխաների աչքի առաջ, գետնին փռել ֆիզիկայի ուսուցչին, ապա բռնի ուժով բերման ենթարկել։ Սոցցանցերում աշակերտների ծնողներն ահազանգում են՝ երեխաները շոկի մեջ են։ Նրանց խոսքով՝ երեխաները վախեցած իրենց են զանգահարել՝ խնդրելով գալ ու իրենց տանել դպրոցից։
9-րդ դասարանի աշակերտի ծնողի հիշատակած ուսուցիչը, ըստ ավելի ուշ Քննչական կոմիտեի կողմից տարածած հաղորդագրության, բերման է ենթարկվել երեխայի նկատմամբ անառակաբարո գործողություններ կատարելու հոդվածի հատկանիշներով․ «Քննիչի կողմից կայացվել է նշված աշխատակցին ձերբակալելու և վարույթն իրականացնող մարմնին ներկայացնելու վերաբերյալ որոշում, ինչը և իրականացվել է։ Այս պահին նշված անձի հետ կատարվում են համապատասխան քննչական գործողություններ։ Այլ տեղեկատվություն, նախաքննության շահերից ելնելով և հաշվի առնելով անմեղության կանխավարկածը, չի հրապարակվում»։
Քննչական կոմիտեի հաղորդագրությունից պարզ է դառնում, որ շուտով ձերբակալված ուսուցչին կալանավորելու միջնորդության կներկայացնեն։ Իսկ այդ ընթացքում դպրոցում ակտիվ ելումուտը շարունակվում էր, բայց աշխատակիցները և ուսուցիչները խուսափում էին մեկնաբանություններից։
Դատապարտելով սեռական ենթադրյալ ոտնձգությունը՝ քաղհասարակությունը և սոցցանցերի օգտատերերը բարձրաձայնում են ԱԱԾ աշխատակիցների ոչ կոմպետենտ գործելաոճը անչափահաս երեխաների աչքի առաջ։
Այսպիսի պահվածքը երեխաների աչքում նսեմացնում է ուժային կառույցների աշխատակիցների կերպարը, կարծիք է հայտնում իրավապաշտպան Նինա Կարապետյանցը։ Նա հարց է բարձրացնում, իսկ ի՞նչ կլինի, եթե մեղադրանքը վերջում չհաստատվի, ինչն է՛լ ավելի ցցուն դարձնի իրավապահների թույլ վիճակը։
Ուժային կառույցի աշխատակիցների բռնի գործողությունների մասով իր մտահոգությունն է հայտնել Կրթության, գիտության, մշակույթի և սպորտի նախարարությունը՝ նշելով, որ արդեն իսկ գրությամբ դիմել է համապատասխան մարմիններին՝ կատարված գործողությունների՝ երեխայի լավագույն շահի տեսանկյունից իրավաչափության վերաբերյալ պարզաբանում ստանալու նպատակով: ՄԻՊ-ը նույնպես ուսումնասիրություն է սկսել։
Մանրամասները՝ տեսանյութում։
Ռոզա Վարդանյան
