Քոչարյանը և Սերժ Սարգսյանը որևէ կերպ խանգարե՞լ են Ձեզ. հարց` Բագրատ Գալստանյանին․ ՏԵՍԱՆՅՈՒԹ

«Ոչ ոք չի խոչընդոտել և չի կարող խոչընդոտել այս շարժմանը»,- այսօր ասաց Բագրատ արքեպիսկոպոս Գալստանյանը՝ պատասխանելով Factor TV-ի հարցին՝ արդյո՞ք Ռոբերտ Քոչարյանը և Սերժ Սարգսյանը որևէ բացասական ազդեցություն ունեցել են իր պայքարի ընթացքի վրա։

Հիշեցնենք՝ մի քանի օր առաջ Շիրակի թեմի առաջնորդ Միքայել արքեպիսկոպոս Աջապահյանը մեղադրական սլաքներ էր ուղղել դեպի Սերժ Սարգսյանն ու Ռոբերտ Քոչարյանը։

«Ես ակնարկել եմ այս բոլոր ամիսներին, թե ինչն է պատճառը իր որոշակի անհաջողության: Հիմա թերեւս ավելի բացահայտ կարող եմ ասել: Հիմնական պատճառը նախկին նախագահների ստվերն է և ուրվականն է: Այդ ուրվականներից չի կարող ազատվել Բագրատ Սրբազանը, այդ ուրվականների հեղինակներն իրենք պետք է հայտարարեն իրենց հեռացման մասին և իրապես հեռանան: Հայրենիքի փրկությունը դա պահանջում է, ու եթե իրենք դա չեն անում, ուրեմն հայրենիքի փրկության մասին չեն մտածում, իրենք մտածում են իշխանության վերադառնալու կամ, այսպես ասած, ընդդիմության իշխանությունը պահպանելու համար: Ե՛վ երկրորդ, և՛ երրորդ նախագահները պետք է հեռանան քաղաքական ասպարեզից»,-ասել էր նա:

Բագրատ արքեպիսկոպոս Գալստանյանից նաև հետաքրքրվեցինք՝ եթե նրանք հայտարարեին քաղաքականությունից հեռանալու մասին, արդյո՞ք դա աջակցություն կհամարվեր։

«Խնդրում եմ դիմեք իրենց գրասենյակներին կամ անձնապես հարցրեք իրենց։ Աջակցության կամ չաջակցության․․․ Դուք հարցն այլ ուղղությամբ եք տանում։ Ես առաջին օրվանից հայտարարել եմ՝ գոյություն ունի մեկ թիրախ, ՀՀ-ին սպառնալիքը այսօր գտնվում է ՀՀ կառավարության թիվ մեկ շենքում»։

Գալստանյանի ղեկավարած շարժումը շատերը՝ այդ թվում, մայիս-հունիս ամիսներին նրան սատարող քաղաքական ուժերի որոշ ներկայացուցիչներ այժմ այն համարում են ձախողված։ Ընդդիմադիր առաջնորդ այդ կարծիքին չէ։

«Ես համարում եմ ձախողված այն մարդկանց, ում համար որևէ շարժում պարզ իրադարձություն է»,-ասաց նա։

Մանրմասները՝ տեսանյութում։