Շոլցը դատապարտել է հակասեմականությունը և Իսրայելի նկատմամբ «կույր ատելությունը»

Իսրայելի վրա ՀԱՄԱՍ-ի հարձակման առաջին տարելիցին ընդառաջ Գերմանիայի կանցլեր Օլաֆ Շոլցը կոչ է արել համերաշխություն ցուցաբերել Գերմանիայի բոլոր հրեաների նկատմամբ։ Երբեք չպետք է այնպես լինի, որ հրեա համաքաղաքացիները «վախի և սարսափի մեջ ապրեն այստեղ՝ Գերմանիայում»,- X-ում հրապարակված տեսաուղերձում ասել է կանցլերը․ փոխանցում է DW-ն։

Ըստ Շոլցի՝ անհնար է պատկերացնել, որ «հրեաներն այլևս չեն կարող համարձակվել կիպա հագած տանից դուրս գալ, որ գերմանական համալսարանների հրեաները կնախընտրեն չասել, որ իրենք հրեաներ են»։ Գերմանիայի կառավարության ղեկավարը կոչ է արել երբեք չհամակերպվել հակասեմականության և Իսրայելի նկատմամբ կույր ատելության հետ։ «Մեր ամբողջ պետությունը և այս երկրի բոլոր պարկեշտ մարդիկ լիակատար համերաշխ են Գերմանիայի հրեաների հետ»,- նշել է նա:

Օլաֆ Շոլցը հիշեցրել է, որ Իսրայելի վրա ՀԱՄԱՍ-ի հարձակումից անմիջապես հետո՝ 2023 թվականի հոկտեմբերին, նա այցելել է Իսրայել և հանդիպել պատանդների հարազատների հետ։ «Ես երբեք չեմ մոռանա այն մարդկանց դեմքերը, ովքեր չգիտեն, թե երբևէ կտեսնեն իրենց դուստրերին, մայրերին, քույրերին, հայրերին, որդիներին կամ եղբայրներին»:

Գերմանիայի կանցլերը նշել է, որ «Իսրայելի վրա հրեշավոր հարձակմամբ» ՀԱՄԱՍ-ը նաև աղետ է հրահրել Պաղեստինի ժողովրդի համար. «Այնքան ավերածություններ, այնքան տառապանքներ, այնքան զոհեր և վիրավորներ»: Հետևաբար, ըստ Շոլցի, Գերմանիայի կառավարությունը շարունակում է համառորեն ձգտել հրադադարի հաստատմանը։