07.04.2026 | 16:45
Թոմաս Ադորյանն առաջին արդյունավետ գործողությունն է կատարել այս մրցաշրջանում․ ՏԵՍԱՆՅՈՒԹ
Ասֆալտին փռել ու տրորել․ ինչպես են մեզ հետ խոսում քաղաքական գործիչները. ՏԵՍԱՆՅՈՒԹ
Քաղաքականություն
03.10.2024 | 22:15
Բագրատ արքեպիսկոպոս Գալստանյանն ամառային դադարից հետո երեկ վերսկսեց Նիկոլ Փաշինյանի հրաժարականի պահանջով ակտիվ գործողությունները։ Հանրապետության հրապարակում հանրահավաքից հետո շարժման ղեկավարը հայտարարեց՝ աջակիցների հետ ուղևորվում է Հանրային հեռուստաընկերություն՝ ժողովրդին ուղերձով դիմելու համար ուղիղ եթեր պահանջելու։ Մինչ այդ էլ Գալստանյանը տեսանյութ-ուղերձ էր հրապարակել համացանցում։
Հայ առաքելական եկեղեցու բարձրաստիճան սպասավորը Նիկոլ Փաշինյանի մասին խոսելիս նրան անվանում է «սատանա»։ Factor TV-ն երեկ նրանից հետաքրքրվեց՝ արդյո՞ք սա հոգևորականին բնորոշ բառապաշար է։
Սիրո և հանդուրժողականության հեղափոխությամբ իշխանության եկածները նույնպես զուսպ չեն իրենց խոսույթում։
Վիրավորանքներն ու սպառնալիքները նաև երեկ շարունակվեցին։ Հանրային հեռուստաընկերության մուտքի մոտ Բագրատ արքեպիսկոպոս Գալստանյանի և ՆԳՆ ոստիկանապետ Արամ Հովհաննիսյանի լեզվակռիվը փողոցային երանգներով էր։ Ո՛չ ոստիկանապետը, ո՛չ Բագրատ Գալստանյանն ավելի ուշ լրագրողների հետ զրույցում այդպես էլ ափսոսանք չհայտնեցին իրենց խոսույթի համար։ Անգամ պատրաստ են, ըստ անհրաժեշտության, շարունակել նույն բառապաշարով։
Անհանդուրժողականության ու ատելության խոսքի դրսևորումների հասարակությունն ականատես է լինում հատկապես նախընտրական շրջանում։ Նիկոլ Փաշինյանը, օրինակ, 2023 թվականի սեպտեմբերի 15-ին՝ Երևանի ավագանու նախընտրական քարոզարշավին, հատուկ ուշադրություն էր հրավիրում՝ ընդդիմադիրներին ուղղված խոսքը լսելի դարձնելու համար։
Իսկ ահա 2021 թվականի խորհրդարանական արտահերթ ընտրությունների քարոզարշավին Փաշինյանը փողոցային բառապաշարի ավելի թունդ դրսևորման դիմեց։ Ի դեպ, այդ օրերին փողոցային բառապաշարն էր ընտրել նաև Սերժ Սարգսյանը։
Եթե այս խոսույթն օգտագործվել է հանրահավաքների ժամանակ, ապա Ալեն Սիմոնյանը Ազգային ժողովի բարձր ամբիոնից թքելու սպառնալիքներ էր հնչեցնում։ 44-օրյա պատերազմի տարելիցի օրն էլ Ալեն Սիմոնյանը «Եռաբլուր»-ում Արցախի ԱԺ պատգամավոր Մետաքսե Հակոբյանին անվանեց «զիբիլի վրայի կատու» այն բանից հետո, երբ Հակոբյանը ՀՀ իշխանության ներկայացուցիչներին դավաճան էր անվանել։
Ոչ նորմատիվ բառապաշարի հարցում Ալեն Սիմոնյանի ու Բագրատ Գալստանյանի կարծիքները, կարծես, համընկնում են։
Այս օրինակները շատ են։ Թե՛ իշխանության և, թե՛ ընդդիմության ներկայացուցիչների՝ փողոցային բառամթերքով հարուստ խոսույթը մեկ ռեպորտաժով հնարավոր չէ ներկայացնել։ Ինչո՞ւ է այս բառապաշարը մտել հրապարակային տիրույթ և ինչպե՞ս պետք է այն բացառել։ Ռեժիսոր Ռուբեն Բաբայանը Factor TV-ի հետ զրույցում ասում է՝ հասարակության մի զգալի մասի պահանջը հենց նման բառապաշարն է։
Ընդդիմադիր շարժման աջակից, հրապարակախոս Մարինե Պետրոսյանը Բագրատ Գալստանյանի մղումներն ազնիվ է համարում, իսկ նրա օգտագործած բառապաշարը, այդ թվում՝ «նեռը», տեղին։
Արդյո՞ք վիրավորանքն ու հայհոյանքը լուծում են ՀՀ-ի առջև ծառացած անվտանգային խնդիրները։ Ռեժիսոր Ռուբեն Բաբայանը կարծում է, որ հայհոյանքը հնչում է, երբ փաստարկներն են բացակայում։
Մանրամասները՝ տեսանյութում։
Նարեկ Կիրակոսյան
