11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Amnesty International-ը Ֆրանսիային կոչ է արել հրատապ հետաքննել Ալիևի քննադատի սպանությունը
Քաղաքականություն
03.10.2024 | 18:26
Amnesty International միջազգային իրավապաշտպան կազմակերպությունն անդրադարձել է Ֆրանսիայում ադրբեջանցի քաղաքական էմիգրանտ Վիդադի Իսկենդերլիի մահվանը։
«Վիդադի Իսկենդերլիի բռնի մահը պետք է արդյունավետ և արագ հետաքննվի։ Մենք կոչ ենք անում Ֆրանսիայի իշխանություններին դիտարկել նրա սպանության բոլոր հնարավոր դրդապատճառները, ներառյալ՝ նրա քննադատությունը Ադրբեջանի նախագահի և կառավարության հասցեին, որն էլ հանգեցրել է նրա արտաքսմանը։ Այս զազրելի հանցագործությունը պետք է հրատապ հետաքննվի, հանցագործության բոլոր կասկածյալները պետք է արդար դատավարության ընթացքում պատասխանատվության ենթարկվեն»,- ասել է կազմակերպության Հարավային Կովկասի հարցերով հետազոտող Նատալյա Նոզաձեն։
Նա նշել է, որ վերջին տարիներին սա երկրորդ դեպքն է, որ Ֆրանսիայում աքսորում ապրող ադրբեջանցին դառնում է դանակահարության զոհ։
«Փարիզը պետք է ապահովի վտանգի տակ գտնվող անձանց արդյունավետ պաշտպանությունը, որոնք միջազգային պաշտպանություն են փնտրում Ֆրանսիայում: Աշխարհը պետք է իմանա, թե ով է պատասխանատու ֆրանսիական հողի վրա ադրբեջանցի էմիգրանտների դեմ իրականացված այս հարձակումների և քայլերի համար, որպեսզի դա չկրկնվի»,- հայտարարել է նա։
Հիշեցնենք՝ Իսկենդերլին հարձակման էր ենթարկվել Ֆրանսիայի Մյուլուզ քաղաքում իր բնակարանում սեպտեմբերի 29-ին ու երկու օր անց հիվանդանոցում մահացել։ Նրան դանակի 24 հարված էր հասցվել։ Իսկենդերլին հայտնի է Ադրբեջանի կառավարության ու նախագահ Իլհամ Ալիևի հասցեին կոշտ քննադատություններով։ Ադրբեջանում նա զբաղվել է ընդդիմադիր գործունեությամբ, կալանավորվել է և դատապարտվել։ Շուրջ 10 տարի առաջ նա մեկնել է Ֆրանսիա և ապաստան գտել այնտեղ։
Հավելենք, որ 2021 թվականի մարտին էլ ադրբեջանցի բլոգեր և ընդդիմադիր գործիչ Մուհամեդ Միրզալին էր Ֆրանսիայի Նանտ քաղաքում հարձակման ենթարկվել։ Նրան դանակի 16-17 հարված էր հասցվել, սակայն բլոգերը ողջ է մնացել։
Թարգմանությունը՝ Էմմա Չոբանյանի
