«Ալիևը սպանեց իր հերթական քննադատին»․ Ֆրանսիայում մահացել է դանակահարված ադրբեջանցի քաղաքական էմիգրանտը

Ֆրանսիայի Մյուլուզ  քաղաքի հիվանդանոցում մահացել է ադրբեջանցի քաղաքական էմիգրանտ Վիդադի Իսկենդերլին։ Այս մասին ադրբեջանական լրատվամիջոցներին հայտնել է նրա եղբայրը՝ Օքթայ Իսկենդերլին։ Բժիշկների խոսքով՝ չի հաջողվել դադարեցնել արնահոսությունն ու վերականգնել շնչառությունը։

Իսկենդերլիի եղբայրը պատմել է, որ հուղարկավորությունը տեղի է ունենալու մեկ շաբաթից՝ համապաստախան դատաբժշկական փորձաքննություններից հետո։

Այսօր ավելի վաղ Օքթայ Իսկենդերլին լրատվամիջոցներին մանրամասներ էր պատմել եղբոր դեմ տեղի ունեցած հարձակումից։

«Գլխավոր բժիշկն ասաց, որ Վիդադիի վիճակը ծայրահեղ ծանր է և անհույս։ Առավոտյան նրա ինքնազգացողությունն է՛լ ավելի էր վատացել, բժիշկները դժվարությամբ էին նրան կյանք վերադարձնում։ Նրան դանակի 24  հարված է հասցվել․ 21 հարված՝ որովայնի խոռոչին, ևս մեկը՝ լյարդին, մեկ ուժեղ հարված՝ թոքին ու մեկ հարված՝ գլխի հետևի հատվածին։ Թոքին հասցված հարվածը զգալիորեն վնասել էև այն և դժվարացնում էր շնչելը։ Բժիշկն ասաց՝ չի կարողանում կանգնեցնել արնահոսությունը»,- պատմել է նա։

Հիշեցնենք, որ քաղաքական էմիգրանտ Վիդադի Իսկենդերլին հարձակման էր ենթարկվել Ֆրանսիայում իր բնակարանում։ Ֆրանսիական ոստիկանությունը դեռևս տեղեկություններ չի հաղորդում գործի վերաբերյալ։ Երկու տարի առաջ Իսկենդերլին կրկին հարձակման էր ենթարկվել։ Ոստիկանությունը պարզել էր, որ դա տեղի հանցավոր խմբավորումների ձեռքի գործն է: Իսկենդերլին կարծում է, որ հրահանգը եկել է Ադրբեջանի իշխանություններից։

Իսկենդերլին հայտնի է սոցցանցերում Ադրբեջանի իշխանությունների հասցեին կոշտ քննադատությամբ։ Ադրբեջանում նա զբաղվել է ընդդիմադիր գործունեությամբ, կալանավորվել է և դատապարտվել։  Շուրջ 10 տարի առաջ նա մեկնել է Ֆրանսիա և այժմ բնակվում էր այնտեղ։

Ադրբեջանցի ընդդիմադիր լրագրող Աֆգան Մուխթարլին, որը բնակվում է Գերմանիայում, մեկնաբանելով Իսկենդերլիի մահը՝ նշել է, որ նա Ադրբեջանի նախագահ Իլհամ Ալիևի հերթական զոհերից է։

«Վիդադի Իսկենդերլին մահացել է դանակի բազմաթիվ վնասվածքների հետևանքով։ Ավելի ճիշտ՝ սպանել են Վիդադիին։ Իլհամ Ալիևը հերթական անգամ սպանեց իրեն քննադատողին։ Մարտին Իլհամը Զահիդ Օրուջի (Ադրբեջանի Մեջլիսի պատգամավոր) լեզվով զգուշացրել էր, որ մենք կսպանենք էմիգրատներին։ Վիդադին աքսորում սպանված 4-րդ ընդդիմադիրն է․ Բայրամ Մամեդով՝ Թուրքիա, Վուգար Ռզա՝ Բելգիա, Հուսեյն Բաքըխանով՝ Վրաստան,Վիդադի Իսկենդերլի՝ Ֆրանսիա»,- գրել է Մուխթարլին ֆեյսբուքյան իր էջում։

Էմմա Չոբանյան