Վրաստանի նախագահը չի ստորագրել ԼԳԲՏ-ի մասին խորհրդարանի ընդունած օրենքը

Վրաստանի նախագահ Սալոմե Զուրաբիշվիլին չի ստորագրել սեպտեմբերին երկրի խորհրդարանի կողմից ընդունված ԼԳԲՏ քարոզչությունն արգելող օրենքը, ինչը նշանակում է, որ վիճահարույց օրենքը կստորագրի խորհրդարանի նախագահ Շալվա Պապուաշվիլին, և փաստաթուղթն ուժի մեջ կմտնի հրապարակումից հետո, գրում է Civil Georgia-ն։

Նախագահը չի օգտագործել իր վետոյի իրավունքը, ինչի արդյունքում օրինագիծը հետ կուղարկվեր խորհրդարան՝ քննարկման, իսկ օրենքի վերջնական ընդունումը կհետաձգվեր մի քանի շաբաթով։ Նախագահը դեռևս հրապարակավ չի մեկնաբանել իր որոշումը։

Սեպտեմբերի 17-ին երկրի իշխող «Վրացական երազանքի» մեծամասնության կողմից ընդունված ԼԳԲՏ-ի դեմ օրենսդրական փաթեթը բաղկացած է «Ընտանեկան արժեքների և անչափահասների պաշտպանության մասին» հիմնական օրինագծից և Վրաստանի տարբեր օրենքներում 18 ուղեկցող փոփոխություններից։

Օրենքն ուժի մեջ մտնելուց հետո թույլ չի տրվի գրանցել «այլընտրանքային» ամուսնական միություն, իսկ այն մարդկանց, որոնք նույնականացնում են իրենց որպես այլ սեռ հետ,  քան իրենց կենսաբանական սեռն է, չի  թույլատրվի երեխա որդեգրել։Արգելվելու է  փաստաթղթերում նշել անձի սեռից տարբերվող սեռը,  ինչպես նաև կատարել սեռափոխության գործողություններ։

Ուսումնական հաստատություններում արգելվում է «ԼԳԲՏ քարոզչությունը», ինչպես նաև հանրային հանդիպումները կամ ցույցերը, որոնք ուղղված են այլ սեռով անձի նույնականացմանը, նույնասեռական հարաբերություններին։

Թարգմանությունը՝ Էմմա Չոբանյանի