Գալստանյանը դատապարտվեց անհաջողության՝ Քոչարյանին, Սարգսյանին հանդիպեց․ շարժումը կձախողվի՝ նախկինների հետ է կապված․ Էդգար Վարդանյան. ՏԵՍԱՆՅՈՒԹ

Հայաստանում քանի՞ այլընտրանքային ծրագիր կամ հայացք կա Ադրբեջանի հետ հարաբերվելու՝ Նիկոլ Փաշինյանի ղեկավարած «Քաղաքացիական պայմանագրի» վարած քաղաքականությունից բացի։ Այս վեց տարում Փաշինյանի մոտեցումները փոփոխությունների են ենթարկվել՝ «Արցախը Հայաստան է, և վե՛րջ»-ից սկսած մինչև Ադրբեջանի տարածքային ամբողջականության ճանաչումը՝ ներառյալ ԼՂ-ն։ Հոկտեմբերի 2-ին Բագրատ Գալստանյանը և նրան համախոհ ընդդիմադիր ուժերը հանրահավաք են հրավիրել, և ենթադրելի է՝ նորից Փաշինյանի կառավարության հեռացման պահանջ կդրվի։ Ինչի՞ մասին է այդ երկրորդ՝ այլընտրանքային ծրագիրը, որը դուրս է իշխանության մոտեցումներից։

«Կա ՔՊ-ի մոտեցումը հայ-ադրբեջանական հարաբերությունների, խաղաղության պայմանագրի, արտաքին հարաբերությունների վերաբերյալ, և կա այն մոտեցումը, թե այդ ամենը նրա համար է, որ Արևմւոտքը քանդի ՀՀ-ն, որ ՌԴ-ին պարտության մատնի։ Բայց դրա հետ մեկտեղ ասվում են թեզեր, որոնք իրար կապված էլ չեն հաճախ։ Ասեք՝ այսօր փողոցում ակտիվություն ցուցաբերող ընդդիմության մոտեցումը ՀՀ-Ադրբեջան հարաբերությունների վերաբերյալ որն է, չկա այդպիսի հստակություն։ «Արժանապատիվ խաղաղություն» ասվածն ընդամենը բառեր են։ Եթե կոնկրետ հարցեր տաք՝ դուք եթե իշխանության գաք, մեկ ամսվա ընթացքում ուժով ազատագրելո՞ւ եք Ջերմուկի շուրջ Ադրբեջանի կողմից գրավված տարածքները, բանակցություններից հրաժարվելո՞ւ եք, զրոյի՞ց եք սկսելու, ի՞նչ հարաբերություններ եք հաստատելու Ադրբեջանի հետ։ ՌԴ-ն միշտ ասել է, որ ԼՂ-ն Ադրբեջանի տարածք է, և շարունակում է ասել դա, ո՞րն է ընդդիմության մոտեցում, ո՞րն է ընդդիմության ծրագիրը»,- Factor TV-ի հետ զրույցում ասում է Էդգար Վարդանյանը։

Քաղաքագետի գնահատմամբ՝ Գալստանյանը փորձում է ընդդիմադիր շարժումը ինստիտուցիոնալ դարձնել, և ԱԺ ընտրությունների նախաշեմին կոալիցիայիով հանդես գալ։ Նա չի բացառում, որ Գալստանյանը առաջնորդի այդ ցուցակը՝ որպես ընդդիմության վարչապետի թեկնածու։ Սակայն Վարդանյանը կարծում է՝ Ռոբերտ Քոչարյանին, Սերժ Սարգսյանին հանդիպելը ձախողման է տանում ընդդիմադիր շարժումը, քանի որ նախկինների հետ կապվածությունը ակնհայտ է դառնում։

Հարցազրույցն ամբողջությամբ՝ տեսանյութում։

Ռոբերտ Անանյան