16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Իսրայելը հարված է հասցրել Բեյրութում «Հըզբոլլահի» կենտրոնական շտաբին. կան զոհեր և վիրավորներ
Քաղաքականություն
28.09.2024 | 01:22
Ուրբաթ երեկոյան իսրայելական բանակը Բեյրութի հարավի Դահիա շրջանում հրթիռային հարված է հասցրել «Հըզբոլլահ» խմբավորման կենտրոնական շտաբին։ Այս մասին տեղեկացնում է BBC-ի ռուսական ծառայությունը։ Հաղորդվում է, որ թիրախը հնարավոր է՝ «Հըզբոլլահի» ղեկավար Հասան Նասրալլան է, սակայն առայժմ հավաստի տեղեկություններ չկան այն մասին, թե արդյոք նա կարող էր տուժել:
Հարվածներից քիչ առաջ Իսրայելի վարչապետ Բենյամին Նեթանյահուն ելույթ է ունեցել ՄԱԿ-ի Գլխավոր ասամբլեայի նստաշրջանում և հայտարարել, որ իր երկիրը հաղթում է պաղեստինյան ՀԱՄԱՍ խմբավորման և լիբանանյան «Հըզբոլլահի» դեմ պատերազմում:
Իսրայելական բանակի հայտարարության համաձայն՝ «բարձր ճշգրտության հարվածն» ուղղված է եղել խմբավորման կենտրոնական շտաբի դեմ։
Հաղորդվում Է տասնյակ զոհերի և մասշտաբային ավերածությունների մասին: Սակայն առայժմ հաստատվել է միայն երկու մարդու մահը, ևս 76-ը վիրավորվել են։
Դեպքի վայրից ստացված տվյալների համաձայն՝ հարվածներից մեկը հասցվել է դպրոցից ընդամենը 700-800 մետր հեռավորության վրա, որտեղ պատսպարվում են Լիբանանի հարավից իսրայելական կրակոցներից փախած մարդիկ:
Այդ առիթով հատուկ թողարկված տեսաուղերձում Իսրայելի պաշտպանության բանակի մամուլի քարտուղար, դերծովակալ Դանիել Հագարին քաղաքացիական բնակչության շրջանում զոհերի պատասխանատվությունը դրել է «Հըզբոլլահի» ղեկավարության վրա: Նրա խոսքով ՝ խմբավորման առաջնորդները «միտումնավոր շտաբ են տեղակայել բնակելի տների տակ՝ Լիբանանի բնակչությանը որպես կենդանի վահան օգտագործելու համար:
Իրանի իշխանություններն իրենց վրդովմունքն են հայտնել: Բեյրութում Թեհրանի դեսպանը իսրայելական բանակի ուրբաթօրյա հարվածներն անվանել է «վտանգավոր էսկալացիա»: Երկրի վարչապետ Բենիամին Նեթանյահուն ՄԱԿ-ում ելույթից կարճ ժամանակ անց հայտարարել է, որ ընդհատում է ԱՄՆ-ում այցն ու վերադառնում Իսրայել:
Լիբանանի վարչապետի պաշտոնակատարը ևս ընդհատել է իր այցն ԱՄՆ՝ Բեյրութին իսրայելական հարվածի պատճառով: Նաջիբ Միքաթիի մամուլի ծառայությունը հայտնել է՝ «Բեյրութի հարավային արվարձանի դեմ իսրայելական ագրեսիայից հետո Լիբանանում տեղի ունեցածի լույսի ներքո վարչապետը որոշել է ավարտել հանդիպումները Նյու Յորքում ՄԱԿ-ի Գլխավոր վեհաժողովի շրջանակներում»:
