22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Բորելն Իրանի ԱԳ նախարարի հետ քննարկել է միջուկային ծրագրի շուրջ բանակցությունների վերսկսումը
Քաղաքականություն
25.09.2024 | 20:11
ԵՄ դիվանագիտության ղեկավար Ժոզեպ Բորելը Նյու Յորքում ՄԱԿ-ի Գլխավոր վեհաժողովի շրջանակում հանդիպել է Իրանի արտգործնախարար Աբբաս Արաղչիի հետ։ Նրանք քննարկել են Մերձավոր Արևելքում հակամարտությունը, Մոսկվայի հետ Թեհրանի համագործակցությունը և Իրանի միջուկային ծրագիրը։ Բորելի հնչեցրած թեզերը հրապարակվել են Եվրոպական արտաքին գործողությունների ծառայության կայքում։
Իրանի արտգործնախարարի հետ զրույցում նա մատնանշել է մերձավորարևելյան հակամարտության սրման վտանգը չեզոքացնելու անհրաժեշտությունը։ Հակառակ դեպքում, ըստ նրա, ամբողջ տարածաշրջանը կբախվի կործանարար հետևանքների։
ԵՄ դիվանագիտության ղեկավարը կոչ է արել Իրանին օգտագործել իր ազդեցությունը՝ խուսափելու հակամարտության սրացումից։
«ԵՄ-ն կշարունակի անել հնարավոր ամեն բան՝ աջակցելու խաղաղության և բանականության ձայնին։ Զինադադարի և պատանդների ազատ արձակման մասին համաձայնագիրը պետք է իրական առաջնահերթություն լինի Գազայի հատվածում խաղաղ բնակիչների իրավիճակի բարելավման համար»,- ասվում է հայտարարության մեջ:
Ժոզեպ Բորելը և Աբբաս Արաղչին քննարկել են նաև Իրանի միջուկային ծրագրի շուրջ բանակցությունների վերսկսումը։
«Որպես Գործողությունների համատեղ համապարփակ ծրագրի համակարգող՝ Բարձր ներկայացուցիչը հայտնել է իր շարունակական հանձնառությունը՝ խթանելու դիվանագիտական լուծումը, որը հաշվի կառնի տարբեր կողմերի մտահոգությունները»,- ասվում է հայտարարության մեջ:
Գործողությունների համատեղ համապարփակ ծրագիրը (JCPOA) համաձայնեցվել է Իրանի, Մեծ Բրիտանիայի, Գերմանիայի, Չինաստանի, Ռուսաստանի, ԱՄՆ-ի և Ֆրանսիայի կողմից 2015 թվականի հուլիսին։ Որպես գործարքի մաս՝ Թեհրանը համաձայնել է սահմանափակել իր միջուկային ծրագիրը՝ իր դեմ միջազգային պատժամիջոցների չեղարկման դիմաց։
Այնուամենայնիվ, 2018 թվականին Միացյալ Նահանգները դուրս եկավ JCPOA-ից՝ վերադարձնելով Իրանի դեմ պատժամիջոցները։ Մեկ տարի անց Թեհրանը որոշեց հրաժարվել պայմանագրով նախատեսված մի շարք պարտավորություններից, այդ թվում՝ ուրանի հարստացման մակարդակի բարձրացմանը և պաշարների ավելացմանը։
Բորելը և Արաղչին ուշադրություն են դարձրել նաև Իրանի և Ռուսաստանի համագործակցությանը։ Ժոզեպ Բորելը հայտարարել է, որ ԵՄ-ն դատապարտում է իրանական հրթիռների փոխանցումը Ռուսաստանին։
Թարգմանությունը՝ Տաթև Ֆռանգյանի
