Իսրայելը որսացել է հրթիռը, որի թիրախը, ենթադրաբար, Մոսադի կենտրոնակայանն է եղել

«Հըզբոլլահը» չորեքշաբթի հայտարարել է, որ բալիստիկ հրթիռ է արձակել Թել Ավիվի մոտ գտնվող իսրայելական Մոսադ հետախուզական ծառայության կենտրոնակայանի ուղղությամբ: Միաժամանակ, իսրայելական զորքերը հարվածներ են հասցրել խմբավորման զինյալներին Լիբանանի հարավում, գրում է VOA-ն։

Իսրայելացի զինվորականները հայտնել են Լիբանանից արձակված հրթիռը որսալու մասին: Հարձակման պատճառով Թել Ավիվում միացվել են օդային ռմբակոծման տագնապի ազդանշանները։

Իսրայել-Լիբանան սահմանին հակամարտության սրումը կլինի չորեքշաբթի Նյու Յորքում կայանալիք ՄԱԿ-ի Անվտանգության խորհրդի նիստի գլխավոր թեման։

Միաժամանակ, ռազմական գործողությունները զսպելու և ավելի լայն տարածաշրջանային հակամարտությունը կանխելու դիվանագիտական ջանքերի շրջանակում Ֆրանսիայի նախագահ Էմանուել Մակրոնը երեքշաբթի հանդիպել է Իրանի նախագահ Մասուդ Փեզեշքիանի հետ։ Մակրոնի գրասենյակը հայտարարել է, որ Ֆրանսիայի առաջնորդն «ընդգծել է Իրանի պատասխանատվությունը՝ աջակցելու ընդհանուր ապաէսկալացիային և օգտագործելու իր ազդեցությունը ապակայունացնող դերակատարների վրա»:

Իրանն աջակցում է և՛ լիբանանյան «Հըզբոլլահ»-ին, և՛ պաղեստինյան ՀԱՄԱՍ-ին, որի դեմ Իսրայելը կռվում է Գազայի հատվածում։

Լիբանանի առողջապահական մարմինները հայտնել են, որ երկուշաբթի օրվանից ի վեր Իսրայելի հարձակումների հետևանքով զոհվել է առնվազն 564 մարդ, վիրավորվել՝ 1800-ը:

Իսրայելն իր հերթին հայտարարել է, որ Բեյրութի հարավային արվարձաններին հասցված հարվածներից մեկի հետևանքով սպանվել է Իբրահիմ Մուհամմադ Քոբեյսը, ում Իսրայելը նկարագրել է որպես «Հըզբոլլահ»-ի բարձրաստիճան հրամանատար, որը վերահսկել է խմբավորման հրթիռային համակարգերը:

Թարգմանությունը՝ Տաթև Ֆռանգյանի