15.12.2025 | 18:38
Արգենտինայի հավաքականը կարող է զրկվել ԱԱ-2026-ի մասնակցության իրավունքից
Տասնյակ հազարավոր մարդիկ Լիբանանում հեռացել են իրենց տներից Իսրայելի հարվածների պատճառով․ ՄԱԿ
Քաղաքականություն
24.09.2024 | 18:11
ՄԱԿ-ը հայտարարել է, որ տասնյակ հազարավոր մարդիկ լքել են իրենց տները Լիբանանում երկուշաբթի օրվանից Իսրայելի շարունակվող հարվածների պատճառով, հաղորդում է France 24-ը։
«Մենք լրջորեն անհանգստացած ենք հարձակումների լուրջ սրացումով, որը տեսանք երեկ։ Տասնյակ հազարավոր մարդիկ երեկ և գիշերվա ընթացքում ստիպված են եղել լքել իրենց տները, և այդ թիվը շարունակում է աճել»,- Ժնևում լրագրողներին ասել է ՄԱԿ-ի փախստականների հարցերով գործակալության խոսնակ Մեթյու Սալթմարշը։
Լիբանանի Առողջապահության նախարարության տվյալներով՝ Լիբանանում իսրայելական օդային հարվածների հետևանքով զոհերի թիվը հասել է 558-ի, այդ թվում՝ 50 երեխա և 94 կին։
ՄԱԿ-ի պաշտոնյան հայտարարել է, որ այն պատերազմից արդեն ավերված տարածաշրջան է և երկիր, որը շատ լավ գիտի տառապանքը․ «Քաղաքացիական զոհերն անընդունելի են»։
ՄԱԿ-ի իրավունքների գրասենյակի խոսնակ Ռավինա Շամդասանին նույնպես ասել է, որ գործակալությունը «չափազանց անհանգստացած է Իսրայելի և «Հըզբոլլահ»-ի միջև ռազմական գործողությունների կտրուկ սրման կապակցությամբ»: Նա կոչ է արել «բոլոր կողմերին անհապաղ դադարեցնել բռնությունը և ապահովել խաղաղ բնակչության պաշտպանությունը»:
«Մենք այսօր զգուշացնում ենք, որ այս հակամարտության ցանկացած հետագա սրացում բացարձակապես աղետալի կլինի Լիբանանի բոլոր երեխաների համար։ Երեկ վերջին 18 տարվա ընթացքում ամենավատ օրն էր Լիբանանի համար։ Այս բռնությունը պետք է անհապաղ դադարեցվի, այլապես հետևանքները սարսափելի կլինեն»,- ասել է Լիբանանում ՅՈՒՆԻՍԵՖ-ի ներկայացուցչի տեղակալ Էթի Հիգինսը՝ ելույթ ունենալով Բեյրութից տեսակապի միջոցով:
Թարգմանությունը՝ Էմմա Չոբանյանի
