30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԱՄՆ-ը դեմ է Լիբանանում Իսրայելի հնարավոր ցամաքային գործողությանը
Քաղաքականություն
24.09.2024 | 15:23
ԱՄՆ-ը մտադիր է «կոնկրետ քայլեր» ձեռնարկել Մերձավոր Արևելքում հակամարտության սրումը կանխելու համար և դեմ է Իսրայելի գործողությանը Լիբանանում։ Այս մասին գրում է AFP-ն՝ վկայակոչելով անանուն բարձրաստիճան պաշտոնյային։
Նրա խոսքով՝ ամերիկյան կառավարությունը դիտարկում է մի քանի գաղափար, որոնք ԱՄՆ ներկայացուցիչները նախատեսում են քննարկել գործընկերների հետ այս շաբաթ, փոխանցում է The Times of Israel-ը։
Աղբյուրը հույս է հայտնել, որ ԱՄՆ-ի առաջարկները կկարողանան հակամարտությունը տեղափոխել դիվանագիտական մակարդակ, որտեղ երկու կողմերն էլ կկարողանան կարգավորել իրավիճակը։ Նա հրաժարվել է մանրամասն նկարագրել ԱՄՆ-ում քննարկվող գաղափարները, միայն նշել է, որ այդ առաջարկները կքննարկվեն ՄԱԿ-ի Գլխավոր վեհաժողովի շրջանակում ԱՄՆ բարձրաստիճան պաշտոնյաների, այդ թվում՝ պետքարտուղար Էնթոնի Բլինքենի հանդիպումների ժամանակ:
«Մենք ակնհայտորեն չենք հավատում, որ Լիբանան ցամաքային ներխուժումը կօգնի նվազեցնել լարվածությունը տարածաշրջանում, կանխել բռնության էսկալացիան, այդ պատճառով էլ մենք այսքան կենտրոնացած ենք՝ այս շաբաթն օգտագործելու, որպեսզի ուսումնասիրենք այդ գաղափարները և այն՝ արդյո՞ք կարող ենք մշակել այդ տարբերակը»,- ասել է նա։
AFP-ի աղբյուրը նշել է նաև, որ ամերիկյան կողմը պետք է «լրջորեն վերաբերվի» Իսրայելի «նախապատրաստումներին»։
Սեպտեմբերի 23-ին Իսրայելը լայնածավալ հարվածներ է հասցրել Լիբանանում գտնվող «Հըզբոլլահ»-ի թիրախներին։ Իսրայելացի զինվորականները հայտնել են 1,6 հազար թիրախների վրա հարձակումների մասին։
