30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Էրդողանն ԱՄՆ-ին կոչ է արել չեղարկել պաշտպանական ոլորտի պատժամիջոցները
Քաղաքականություն
24.09.2024 | 22:34
ՄԱԿ-ի Գլխավոր վեհաժողովին մասնակցելու նպատակով Նյու Յորքում գտնվող Թուրքիայի նախագահ Ռեջեփ Թայիփ Էրդողանը Թուրքական տանը հանդիպել է ամերիկացի և թուրք գործարարների հետ՝ Թուրքիա-ԱՄՆ գործարար խորհրդի (TAIK) կողմից կազմակերպված Թուրքիայի ներդրումային 15-րդ համաժողովի շրջանակում։
Նա հայտարարել է, որ տնտեսական և առևտրային հարցերն ԱՄՆ-ի հետ հարաբերությունների կարևորագույն հարթություններից են․ ԱՄՆ-ը երկրորդ երկիրն էր, ուր արտահանման ամենամեծ ծավալն է արձանագրվել, նաև հինգերորդ երկիրը, որտեղից Թուրքիան ամենաշատն է ներմուծում վերջին երկու տարում։ Երկկողմ ապրանքաշրջանառության ծավալն անցյալ տարի գերազանցել է 30 մլրդ դոլարը։
Էրդողանը, միաժամանակ, ԱՄՆ-ին կոչ է արել հրաժարվել որոշ պատժամիջոցներից, այդ թվում՝ պաշտպանական ոլորտում՝ հույս հայտնելով, որ այդ դեպքում կհասնեն 100 մլրդ դոլարի ընդհանուր նպատակին։
«Դրա համար պետք է հրաժարվել միակողմանի պրակտիկայից, ինչպիսիք են հավելյալ մաքսատուրքերը երկաթի, պողպատի և ալյումինի ոլորտում, հետաքննությունները և CAATSA պատժամիջոցները։ Մենք ակնկալում ենք, որ դուք՝ ոլորտի ներկայացուցիչներդ, կձեռնարկեք անհրաժեշտ նախաձեռնություններ՝ վերացնելու այն խոչընդոտները, որոնք մեզ փոխադարձ կորուստներ են պատճառում»,- ասել է Էրդողանը՝ նկատի ունենալով պաշտպանական պատժամիջոցները, որոնք ԱՄՆ-ը սահմանել է Թուրքիայի նկատմամբ ռուսական C-400 ՀՕՊ համակարգերը գնելու համար։
«Հուսով եմ, որ մենք նոր էջ ենք բացել F-16-ի արդիականացման նախագծով, և ակնկալում ենք, որ այս ոլորտում արտահանման սահմանափակումները վերջնականապես կվերացվեն»,- հավելել է նա։
Թարգմանությունը՝ Էմմա Չոբանյանի
