22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
BP-ն վաճառում է Ադրբեջանից Եվրոպա գազատարում իր բաժնեմասի 20 տոկոսը
Քաղաքականություն
19.09.2024 | 23:04
BP-Ադրբեջանը վաճառում է իր 20 տոկոս բաժնեմասը գազատարում, որը գազ է տեղափոխում Ադրբեջանից Եվրոպա, գրում են ադրբեջանական լրատվամիջոցները՝ վկայակոչելով ընկերության հաղորդագրությունը։
Նշվում է, որ BP-ն համաձայնել է Տրանսադրիատիկ գազատարի (TAP) իր բաժնետոմսերը վաճառել ամերիկյան Apollo Global Management մասնավոր ներդրումային հիմնադրամին։ Գործարքի գումարը կազմում է մեկ միլիարդ դոլար։
TAP խողովակաշարով տարեկան ավելի քան 10 միլիարդ խորանարդ մետր ադրբեջանական գազ է մատակարարվում Եվրոպա։ Ներկայում, Ադրբեջանի և ԵՄ-ի միջև ձեռք բերված պայմանավորվածության համաձայն, բանակցություններ են ընթանում ներդրումներ ներգրավելու ուղղությամբ, որոնց նպատակն է մինչև 2027 թվականը կրկնապատկել գազատարի հզորությունը։ Այնուամենայնիվ, սա նաև պահանջում է գազի արդյունահանման ավելացում և նոր կոմպրեսորային կայանների կառուցում:
Գազատարի հզորությունը կրկնապատկելու աշխատանքների արժեքը փորձագետները գնահատում են միլիարդավոր դոլարներ: Հաշվի առնելով, որ եվրոպական ընկերությունները մեծ հետաքրքրություն չեն ցուցաբերում ադրբեջանական գազի գնման երկարաժամկետ պայմանագրեր կնքելու հարցում, ներդրողների մոտիվացիան՝ ներդրումներ կատարել այս նախագծում, շատ ցածր է։
Պատճառները, որոնք դրդել են BP-ի սեփականատերերին վաճառել TAP-ում իրենց մասնաբաժինը, չեն հաղորդվում:
Նշենք, որ BP-ն գործարքի ավարտից հետո մնալու է TAP-ի վերահսկիչ բաժնետերը:
Ակնկալվում է, որ գործարքը կփակվի 2024 թվականի չորրորդ եռամսյակում, որը ենթակա է կարգավորող մարմինների և գործընկերների հաստատմանը:
Apollo Global Management-ն ամերիկյան գլոբալ այլընտրանքային ներդրումների կառավարման ընկերություն է: Այն ներդրումներ է կատարում վարկային, մասնավոր կապիտալում և իրական ակտիվներում։
Թարգմանությունը՝ Էմմա Չոբանյանի
