30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ալիևը Բլինքենի հետ զրույցում բողոքել է ՀՀ Սահմանադրությունից ու ԵԱՀԿ Մինսկի խմբից
Քաղաքականություն
16.09.2024 | 21:13
ՀՀ վարչապետ Նիկոլ Փաշինյանի հետ հեռախոսազրույցից հետո ԱՄՆ պետքարտուղար Էնթոնի Բլինքենը հեռախոսազրույց է ունեցել նաև Ադրբեջանի նախագահ Իլհամ Ալիևի հետ։
Ըստ ադրբեջանական կողմի հաղորդագրության՝ Բլինքենը կարևորել է Հայաստանի և Ադրբեջանի միջև կայուն խաղաղության հասնելը՝ հավելելով, որ Վաշինգտոնը կշարունակի ջանք չխնայել այդ նպատակին հասնելու համար։ Նա դրական քայլ է գնահատել Հայաստանի և Ադրբեջանի միջև սահմանների սահմանազատման ոլորտում արձանագրված ձեռքբերումները, այդ թվում՝ 2024 թվականի օգոստոսի 30-ին Պետական սահմանազատման հանձնաժողովների համատեղ գործունեության կանոնակարգի ստորագրումը։
Ալիևն իր հերթին ասել է, թե տարածաշրջանում արդեն խաղաղություն է՝ հայտարարելով, որ «Ադրբեջանի ջանքերի արդյունքում տարածաշրջանում ի հայտ են եկել նոր իրողություններ և ստատուս քվո՝ հիմնված արդարության և միջազգային իրավունքի վրա»:
«Նախագահ Իլհամ Ալիևը նշել է, որ Հայաստանի և Ադրբեջանի միջև խաղաղության պայմանագրի նախաձեռնողը մեր երկիրն է, և այդ պայմանագիրը ստորագրելու համար Հայաստանը պետք է հրաժարվի Ադրբեջանի նկատմամբ իր տարածքային պահանջներից՝ հիմնվելով իր Սահմանադրության և այլ օրենսդրական ակտերի վրա, ինչպես նաև ԵԱՀԿ Մինսկի խմբից ու դրան առնչվող բոլոր կառույցները, կարևորել է դրա գործունեության դադարեցումը։ Անդրադառնալով սահմանների սահմանազատման հարցին՝ նախագահ Ալիևը նշել է երկկողմ գործընթացի շրջանակում ձեռք բերված դրական արդյունքները և ասել, որ այդ գործընթացը կիրականացվի արձանագրության հիման վրա»,- ասվում է ադրբեջանական կողմի հաղորդագրության մեջ։
Զրույցի ընթացքում մտքերի փոխանակություն է տեղի ունեցել Ադրբեջանի և ԱՄՆ-ի երկկողմ հարաբերությունների շուրջ։
