14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Զելենսկին մերժել է Բրազիլիայի և Չինաստանի խաղաղության ծրագիրը՝ այն անվանելով ռուսամետ
Քաղաքականություն
12.09.2024 | 16:16
Ուկրաինայի նախագահ Վլադիմիր Զելենսկին բրազիլական Metropoles-ին տված հարցազրույցում ասել է, որ Բրազիլիայի և Չինաստանի կառավարությունների առաջարկած խաղաղության ծրագիրն ավելի համահունչ է Ռուսաստանի շահերին և անընդունելի է մնում Կիևի համար, գրում է BBC-ի ռուսական ծառայությունը;
«Ցավոք, ես կարծում եմ, որ բրազիլաչինական նախաձեռնություններն ավելի շատ ռուսամետ են»,- ասել է Զելենսկին։
Նա նշել է, որ այդ մասին անկեղծորեն ասել է Բրազիլիայի նախագահ Լուիս Ինասիու Լուլա դա Սիլվային։
Չինաստանն ու Բրազիլիան Ուկրաինայում պատերազմի խաղաղ կարգավորման իրենց առաջարկները հրապարակել էին այս տարվա մայիսի վերջին։ Նրանք հայտարարել էին, որ հակամարտությունը դադարեցնելու միակ ճանապարհը բոլոր կողմերի հավասար մասնակցությամբ խաղաղ բանակցությունների անցկացումն է։
Այս շաբաթ Ռուսաստանի փոխարտգործնախարար Սերգեյ Ռյաբկովն ասել է, որ Մոսկվան ողջունում է Բրազիլիայի և Չինաստանի նախաձեռնությունը։
«Կարծում եմ, որ այս նախաձեռնությունն ավելի ու ավելի մեծ աջակցություն է վայելում գլոբալ հարավում»,- ասել էր նա։
Զելենսկիի խոսքով՝ այս «խաղաղության ծրագիրը» համաձայնեցված չի եղել Ուկրաինայի հետ, և Կիևը չի կարող որևէ փոխզիջման գնալ Ռուսաստանի հետ իր տարածքների հարցում։
«Նա՝ ՌԴ նախագահ Պուտինը, մտել է, սպանել մարդկանց, տարածք գրավել ու հիմա Լուլան ասում է՝ թող խոսեն։ Ես կարող էի խոսել Լուլայի հետ, որովհետև Լուլան իմ թշնամին չէ։ Ես պետք է ուժեղ լինեմ, որ նստեմ և խոսեմ ինչ-որ բանի մասին: Նա պետք է քայլեր ձեռնարկի, որպեսզի ցույց տա, որ ցանկանում է, որ պատերազմն ավարտվի։ Դուք չեք կարող պարզապես ասել՝ «մենք պետք է միմյանց ընդառաջ քայլեր ձեռնարկենք»»,- ասել է Ուկրաինայի նախագահը։
