22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Ռուսական բանակը հարվածներ է հասցրել Ուկրաինայի Կոնոտոպ քաղաքին. վիրավորներ կան, քաղաքը մնացել է առանց լույսի ու ջրի
Քաղաքականություն
12.09.2024 | 11:19
Սեպտեմբերի 11-ի լույս 12-ի գիշերը ռուսական բանակը «Շահեդ»-ներով հարվածել է Սումիի շրջանի Կոնոտոպ քաղաքին։ Կան վիրավորներ, քաղաքը մնացել է առանց էլեկտրականության, ասվում է շրջանային վարչակազմի հաղորդագրության մեջ, փոխանցում է Current Time-ը։
Նախնական տվյալներով՝ հարվածի հետևանքով տուժել է 13 մարդ, նրանցից երկուսի վիճակը ծանր է։ Փրկարարական աշխատանքները շարունակվում են։
«Քաղաքի բոլոր վիրաբույժներն աշխատում են։ Տուժածներից շարունակվում են դիմումներ ստացվել։ Այս պահին երկու տղամարդ է հոսպիտալացվել։ Նրանցից մեկը ծայրահեղ ծանր վիճակում է, կոմայի մեջ։ Ի դեպ, նա գնում էր մարդկանց փրկելու»,- գրել է քաղաքապետ Արտյոմ Սեմենիխինը։
Նրա խոսքով՝ քաղաքի էներգետիկ ենթակառուցվածքները լուրջ վնասներ են կրել։
«Կոնոտոպում էլեկտրաէներգիայի հետ կապված իրավիճակը պարզապես կրիտիկական է, էներգետիկ ենթակառուցվածքները զգալի վնաս են կրել։ Էներգետիկները ներկայում անում են ավելին, քան հնարավոր է՝ հիվանդանոցին ու ջրմուղկայանին էլեկտրաէներգիա մատակարարելու համար։: Ոչ ոք չի կարող կանխատեսել, թե երբ գոնե մեկ ժամով էլեկտրականություն կհայտնվի բնակիչների տներում»,- գրել է նա։
Բացի այդ, ըստ Սեմենիխինի, վնասվել են մի քանի ուսումնական հաստատություններ, բժշկական շենքեր, ինչպես նաև քաղաքի կենտրոնում գտնվող տրամվայի գծերի մի հատվածը։
Սեպտեմբերի լույս 12-ի գիշերն Ուկրաինայի ԶՈՒ ռազմաօդային ուժերը հայտնել են երկրով մեկ «Շահեդ»-ների տեղաշարժի մասին։ Շրջանների մեծ մասում, այդ թվում՝ Կիևում և Կիևի մարզում, հայտարարվել է օդային հարձակումների նախազգուշացում։ Պայթյուններ են գրանցվել Խմելնիցկիի և Կիևի շրջաններում։
