Փաշինյանը անբավարար տեմպով է փոխում արտաքին վեկտորը․ պետք է սկսել ԵՄ-ին անդամակցելու գործընթաց․ Հովսեփ Խուրշուդյան․ ՏԵՍԱՆՅՈՒԹ

Հովսեփ Խուրշուդյանը 51 քաղաքացիներից կազմված այն նախաձեռնող խմբի անդամ է, որը դիմել է ԿԸՀ-ին՝ ԵՄ-ին անդամակցելու հարցով հանրաքվե նշանակելու համար ստորագրահավաք սկսելու նպատակով։ Նրանք ունեն 60 օր՝ 50 000 ստորագրություն հավաքելու համար։ Հարց է առաջանում՝ եթե ստորագրահավաքը տեղի ունենա, ՔՊ-ն չի՞ կրկնելու իր դիրքորոշումը, որ նախաձեռնությունը «ժամանակավրեպ է», և գործընթացը չի՞ տապալվի արդյոք։

«Փաշինյանը փոխում է արտաքին վեկտորն անբավարար տեմպով, և անհրաժեշտ է ԵՄ-ին անդամակցելու գործընթացն սկսել։ Դու ոչ թե ասում ես՝ մենք դիմում ենք ԵՄ անդամ դառնալու համար, այլ ասում ես՝ մեկնարկում ենք ԵՄ անդամակցության գործընթացը։ Թե երբ կավարտվի գործընթացը, միայն մեզնից կախված չէ, նաև ԵՄ-ից է կախված։ Բայց պետք է լինի այնպիսի շրջանակ, ըստ որի՝ մենք ԵՄ-ի անդամակցության ենք ձգտում։ Տեսլականը հռչակում ենք և իշխանությունը կարող է շատ ճկուն լինել այս հարցում, գործընթացը 2-3 ամսվա խնդիր չէ։ Ստորագրահավաքն ավարտվում է նոյեմբերի կեսերին, երբ ԱՄՆ-ում և Վրաստանում ընտրություններն ավարտված կլինեն, ռուս-ուկրաինական պատերազմում որոշակիություն կլինի։ Այնպես չէ՝ ասում ենք հինգ օրում արեք այս գործընթացը»,- Factor TV-ի հետ զրույցում նշում է Հովսեփ Խուրշուդյանը։ Ըստ նախաձեռնողների՝ ԵՄ-ին անդամակցելու գործընթացն ինքնին որոշակի անվտանգություն կբերի Ադրբեջանի ռազմական ագրեսիայի սպառնալիքի, ՌԴ-ի միջանցքային պահանջների ներքո ապրող Հայաստանին։

Հարցազրույցն ամբողջությամբ՝ տեսանյութում։

Ռոբերտ Անանյան