16.12.2025 | 22:17
ՖԻՖԱ․ Տարվա լավագույն ֆուտբոլիստը, մարզիչը և գոլը․ ՏԵՍԱՆՅՈՒԹ
Նոյեմբերին կհաստատվի Հայաստան-ԵՄ գործընկերության ընդլայնման ծրագիրը․ Հունգարիայի ԱԳ նախարար
Քաղաքականություն
11.09.2024 | 12:07
Հունգարիայի ԱԳ նախարար Պետեր Սիյարտոն, որը Հայաստանում մասնակցել է «Երևանյան երկխոսություն» միջազգային համաժողովին, ֆեյսբուքյան իր էջում լուսանկարներ է հրապարակել ՀՀ ԱԳ նախարար Արարատ Միրզոյանի հետ հանդիպումից ու խոսել Երևանի հետ դիվանագիտական հարաբերությունների վերականգնման արդյունքների մասին։
«Այն պահից, երբ մենք վերականգնել ենք դիվանագիտական հարաբերությունները Հայաստանի հետ, արդյունքները գալիս են մեկը մյուսի հետևից։ Անցյալ տարի մենք առևտրային ռեկորդ ենք սահմանել։ Հուլիսին գործարկել ենք ուղիղ օդային կապը մեր երկրների միջև, շուտով կստեղծվի տնտեսական համատեղ հանձնաժողովը, և մենք կսկսենք համագործակցությունը ատոմային էներգետիկայի ոլորտում։ Եվրամիությունում մեր նախագահության ժամանակ Հայաստանը 10 մլն դոլարի դրամաշնորհ է ստացել Խաղաղության եվրոպական հիմնադրամից։ Վիզային ռեժիմի դյուրացման շուրջ երկխոսությունը սկսվել է երեկ, և նոյեմբերին, մեր նախագահության ընթացքում, կհաստատենք նաև ԵՄ-Հայաստան գործընկերության ընդլայնման ժամանակացույցը։ Բացի այդ, մենք կվերաբացնենք Հունգարիայի և Հայաստանի դեսպանությունները մեր երկրներում»,- նշել է Սիյարտոն։
Մեկ այլ գրառմամբ էլ նա հայտարարել է, որ Հունգարիան միշտ խաղաղության կողքին է եղել։
«Կովկասի ժողովուրդը նույնպես պետք է վերադարձնի խաղաղ ապրելու իր իրավունքը։ Ուստի Բուդապեշտը պատրաստ է հարթակ տրամադրել հայ-ադրբեջանական խաղաղության համաձայնագրի ստորագրման համար»,- գրել է Հունգարիայի ԱԳ նախարարը։
