11.08.2026 | 09:43
Արմավիրի մարզում 2026-ի առաջին կիսամյակում սպանության, սպանության փորձի և ավազակության բոլոր դեպքերը բացահայտվել են. ՆԳՆ
Իրանի ԱԽ քարտուղարը Ռուսաստան է մեկնել
Քաղաքականություն
10.09.2024 | 13:21
Իրանի Ազգային անվտանգության բարձրագույն խորհրդի քարտուղար Ալի Աքբար Ահմադիանը մեկնել է ՌԴ՝ մասնակցելու ԲՐԻԿՍ-ի երկրների անվտանգության խորհուրդների բարձրագույն պաշտոնյաների հանդիպմանը, հայտնում է IRNA գործակալությունը։
Ահմադիանը Ռուսաստան է մեկնել ռուս գործընկերոջ հրավերով։
Նշվում է, որ ԲՐԻԿՍ-ի երկրների, այդ թվում՝ Բրազիլիայի, Ռուսաստանի, Հնդկաստանի, Չինաստանի, Հարավաֆրիկյան Հանրապետության, Իրանի, Եթովպիայի, ԱՄԷ-ի և Սաուդյան Արաբիայի անվտանգության բարձրաստիճան պաշտոնյաների հանդիպումը տեղի է ունենալու սեպտեմբերի 20-22-ը Սանկտ Պետերբուրգում:
Հաղորդվում է, որ գագաթնաժողովի շրջանակում, բացի ԲՐԻԿՍ-ի անդամների հանդիպումից, տեղի կունենա նաև կազմակերպության անդամ երկրների ներկայացուցիչների և հարավային որոշ երկրների անվտանգության ուժերի բարձրաստիճան ներկայացուցիչների համատեղ հանդիպումը։ Նրանց թվում են՝ Ինդոնեզիան, Թուրքիան, Ղազախստանը, Սերբիան, Թաիլանդը, Բելառուսը, Վիետնամը, Վենեսուելան, Ուզբեկստանը, Նիկարագուան, Կուբան, Ադրբեջանը, Բահրեյնը, Բանգլադեշը, Շրի Լանկան, Մավրիտանիան և Լաոսը։
Այս երկու միջոցառումների շրջանակում Ահմադիանն առանձին հանդիպումներ կունենա իր որոշ գործընկերների հետ։ Նա քննարկելու է միջազգային տարածաշրջանային կարևորագույն զարգացումները և երկկողմ հարաբերությունները քաղաքական, անվտանգության և տնտեսական ոլորտներում, ինչպես նաև Ռուսաստանի բարձրաստիճան պաշտոնյաների հետ հանդիպման ժամանակ էներգետիկ միջանցքների վերաբերյալ Իրանի Իսլամական Հանրապետության նկատառումները:
