07.10.2026 | 23:48
Արթուր Դանիելյանը կալանավորվեց
Ադրբեջանը Սլովակիայից ստացել է 155 մմ-ոց հաուբիցների առաջին խմբաքանակը
Քաղաքականություն
09.09.2024 | 17:52
Ադրբեջանի բանակը ստացել է Սլովակիայից պատվիրված L-45 DITA 155 մմ տրամաչափի ինքնագնաց հաուբիցների առաջին խմբաքանակը։ Այս մասին հայտնում են թուրքական աղբյուրները՝ վկայակոչելով X սոցցանցում հրապարակված կադրերը, գրում են ադրբեջանական լրատվամիջոցները։
Նշվում է, որ Ադրբեջանը ստացել է TATRA T815 8×8 հարթակով հաուբիցների վերջին արդիականացված տարբերակը։ Դրանք հագեցած են կրակի կառավարման լրիվ ավտոմատ համակարգով, անձնակազմը բաղկացած է միայն վարորդից և հրամանատարից։ Այս մոդելի կրակային հզորությունն ու մանևրելու ունակությունն ավելի բարձր են, քան նախորդ տարբերակներինը։
Այս տարվա մայիսին տեղեկություններ էին տարածվել, որ Excalibur Army ընկերությունը մտադիր է Ադրբեջանին ավելի քան 70 միավոր DITA 155 մմ տրամաչափի ինքնագնաց հաուբից մատակարարել։
Ադրբեջանական լրատվամիջոցները գրում են, որ Բաքուն հաուբիցները ձեռք է բերում Սլովակիայից, սակայն Excalibur Army-ին չեխական ընկերություն է, CZECHOSLOVAK GROUP կորպորացիայի մաս է կազմում։
Նշվում էր, որ այս տարվա մարտին Dennik N լրատվամիջոցը, վկայակոչելով ոչ պաշտոնական աղբյուրներին, հայտնել էր, որ Excalibur Army-ն բանակցություններ է վարում ադրբեջանցի գործընկերների հետ ավելի քան 70 DITA հաուբիցների վաճառքի շուրջ։ Խոսքը նոր մոդիֆիկացիայի DITA հաուբիցների վաճառքի մասին է, որը հայտնի է որպես Zuzana 2: Նախկին Չեխոսլովակիայում մշակված 152 մմ տրամաչափի այս հաուբիցները հիմնված են Tatra բեռնատարի շասիի վրա և ունեն մինչև 39 կիլոմետր հեռահարություն:
Էմմա Չոբանյան
