Ալիևը Իտալիայի նախագահին բողոքել է ՀՀ Սահմանադրությունից ու ԵՄ երկրներից

Ադրբեջանի նախագահ Իլհամ Ալիևը  նախօրեն Իտալիայի նախագահ Սերջիո Մատարելլայի հետ համատեղ աշխատանքային ճաշի ժամանակ խոսել է նաև Հայաստանի հետ խաղաղության գործընթացից։

Ադրբեջանական կողմի հաղորդմամբ՝ Ալիևն ասել է, թե հենց «Ադրբեջանն է նախաձեռնել Հայաստանի և Ադրբեջանի միջև խաղաղության պայմանագրի ստորագրումը, այդ պայմանագրի հիմքում ընկած սկզբունքները, ինչպես նաև՝ Հարավային Կովկասում տարածաշրջանային համագործակցության նախագծերը։

Նա ասել է, որ սահմանազատման ու սահմանգծման գործընթացում «լուրջ ձեռքբերումներ» կան, այդ գործընթացի շրջանակներում, որը երկկողմ բնույթ է կրում, արդեն իսկ իրականացվել է ավելի քան 12 կիլոմետր սահմանային տարածքի սահմանազատում և «ադրբեջանական գյուղերը վերադարձվել են Բաքվի հսկողությանը»։

Բացի այդ ՝ Ալիևը կրկին դժգոհել է Հայաստանի Սահմանադրությունից։ Նա հայտարարել է, թե «չնայած նրան, որ Հայաստանի Սահմանադրությունը դեռևս տարածքային պահանջներ է պարունակում Ադրբեջանի նկատմամբ՝ կարևոր  է դրանք վերացնել սահմանադրական փոփոխությունների համապատասխան գործընթացով և ասել, որ դրանից հետո լավ հիմքեր կստեղծվեն երկու երկրների միջև խաղաղության պայմանագրի ստորագրման համար»։

Ադրբեջանի նախագահը նաև իր դժգոհություններն է հայտնել ԵՄ մի շարք երկրներից, որոնք, իբր, խոչընդոտներ են ստեղծում ԵՄ-ի ու Բաքվի հարաբերությունների զարգացման համար։

Ընդգծելով, որ Եվրամիությունը Ադրբեջանի հիմնական առևտրային գործընկերներից է, Ալիևն ասել է, որ ԵՄ-ի և Ադրբեջանի միջև լավ կապեր կան։ Միաժամանակ,  նա ցավով նշել է, թե «որոշ եվրոպական երկրներ խոչընդոտներ են ստեղծում այդ հարաբերությունների զարգացման համար»։