22.01.2026 | 23:29
ՀՀ տարածքում կան փակ ավտոճանապարհներ, Լարսը բաց է
Բաքվի դատարանը մերժել է ՀՀ-ի հետ կապերի կասկածանքով կալանավորված Բահրուզ Սամեդովի բողոքը
Քաղաքականություն
05.09.2024 | 18:33
Բաքվի Սաբայիլի շրջանային դատարանն այսօր մերժել է երիտասարդ գիտնական Բահրուզ Սամեդովի բողոքը բնակարանում խուզարկություն իրականացնելու հետ կապված։ Ադրբեջանական լրատվամիջոցների հաղորդմամբ՝ երբ Սամեդովին տարել են դատարանի դահլիճ, նա բղավել է. «Կեցցե՛ խաղաղությունը։ Կեցցե՛ ժողովուրդների եղբայրությունը»։
Նրա փաստաբան Զիբեյդա Սադիգովան ասել է, որ Սամեդովի բնակարանում խուզարկությունն իրականացվել է առանց դատարանի որոշման։ Պաշտպանական կողմը դատարանին խնդրել է խուզարկության արձանագրությունը ճանաչել անօրինական և վերադարձնել առգրավված իրերը, սակայն դատարանը չի բավարարել բողոքը։ Փաստաբանը նշել է, որ այս որոշումը բողոքարկելու են։
Օգոստոսի 21-ին խուզարկության ժամանակ Սամեդովի բնակարանից առգրավել են նրա համակարգիչները, հեռախոսները, գրքերը։
Հակապատերազմական հայացքներով հայտնի Սամեդովը ձերբակալվել է օգոստոսի 21-ին, երկու օր անց դատարանը նրան 4 ամսով կալանավորել է պետական դավաճանության մեղադրանքով։ Նրան մեղադրում են Հայաստանի հետ կապերի համար։ Սամեդովը հայտնի է նաև տարբեր ԶԼՄ-ներում Ադրբեջանի իշխանությունների մասին քննադատական հոդվածների հրապարակմամբ։
ԵՄ-ն և մի շարք միջազգային կազմակերպություններ դատապարտել են Սամեդովի նկատմամբ հետապնդումները։
