30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԱՄՆ-ն պատժամիջոցներ է սահմանել Մարգարիտա Սիմոնյանի, RT-ի, «Ռիա Նովոստի»-ի, Sputnik-ի նկատմամբ
Քաղաքականություն
05.09.2024 | 11:37
ԱՄՆ-ն պատժամիջոցներ է սահմանել Ռուսաստանի կառավարության կողմից ֆինանսավորվող Russia Today (RT) միջազգային հեռուստաալիքների ցանցի և նրա մի շարք բարձրաստիճան աշխատակիցների, այդ թվում՝ RT-ի գլխավոր խմբագիր Մարգարիտա Սիմոնյանի նկատմամբ, գրում է DW-ի ռուսական ծառայությունը։
Պատժամիջոցները սահմանվել են ի պատասխան «2024 թվականի ԱՄՆ նախագահական ընտրությունների վրա ազդելու Մոսկվայի փորձերի»։ Այս մասին ասվում է ԱՄՆ ֆինանսների նախարարության հաղորդագրության մեջ։ Պատժամիջոցների են ենթարկվել 10 ֆիզիկական անձինք և երկու կազմակերպություններ։
«Россия Сегодня» մեդիա խմբի նկատմամբ սահմանված սահմանափակումները վերաբերում են նաև նրա հինգ դուստր կառույցներին։ Բացի RT-ից, դրանց թվում են «Ռիա Նովոստի»-ն, «TV-Նովոստի»-ն, Ruptly-ն և Sputnik-ը:
ԱՄՆ ֆինանսների նախարարությունը պատժամիջոցներ է սահմանել նաև ոչ առևտրային «Դիալոգ» կազմակերպության և նրա առաջնորդ Վլադիմիր Տաբակի նկատմամբ։ Ինչպես 2023 թվականի սեպտեմբերին պարզել էին ռուսալեզու անկախ լրատվամիջոցները, այն պատասխանատու է Ուկրաինայի պատերազմի մասին կեղծ տեղեկություններ տարածելու լայնածավալ արշավների համար։
Պատժամիջոցներ են սահմանվել նաև կրեմլամետ RaHDit հաքերային խմբավորման երեք անդամների նկատմամբ։ Նշվում է, որ երեքն էլ ռուսական հետախուզության ներկա ու նախկին աշխատակիցներ են:
Ինչպես նշում է ԱՄՆ ֆինանսների նախաարարությունը, ռուսական պետական գերատեսչությունները օգտագործում են արհեստական բանականության տեխնոլոգիաներ, դիփֆեյքեր և ապատեղեկատվություն՝ «խաթարելու վստահությունը ընտրական գործընթացների նկատմամբ» ԱՄՆ-ում և ազդելու դրանց արդյունքների վրա։
Սպիտակ տան մամուլի քարտուղար Ջոն Քիրբին ասել է, որ RT-ն գործում է Ռուսաստանի նախագահ Վլադիմիր Պուտինի իմացությամբ։
Մայիսին ԱՄՆ Ազգային հետախուզության տնօրեն Ավրիլ Հեյնսը Ռուսաստանն անվանել էր «ամենաակտիվ արտաքին սպառնալիքը» գալիք նախագահական ընտրությունների համար։ Նա ասել էր, որ ապատեղեկատվական արշավների շրջանակներում Մոսկվան փորձել է ազդել Միացյալ Նահանգներում միգրացիայի վերաբերյալ բանավեճերի վրա՝ նպատակ ունենալով վրդովմունք առաջացնել ընտրողների մոտ։ Հուլիսին էլ ԱՄՆ արդարադատության նախարարությունը հայտարարել էր X սոցիալական ցանցում «բոտ ֆերմայի» կողմից իրականացվող ռուսական ապատեղեկատվական արշավը դադարեցնելու մասին։ Նշվում էր, որ ԱՄՆ-ում տարաձայնություններ սերմանելու ծրագիրը մշակվել է RT-ի բարձրաստիճան խմբագրի կողմից, որը ֆինանսավորվում է Կրեմլի և աջակցվում՝ ԱԴԾ-ի կողմից։
