Մոսկվան հայտարարել է, թե Արևմուտքի հետ կապված միջազգային կառույցները, իբր, կողմնակալ գնահատական են տվել Ադրբեջանի Մեջլիսի ընտրություններին

ՌԴ ԱԳՆ-ն հայտարարություն է տարածել Ադրբեջանում սեպտեմբերի 1-ին անցկացված Միլլի Մեջլիսի արտահերթ  ընտրությունների  վերաբերյալ։

Մոսկվան ներկայացրել է Ադրբեջանի Կենտրոնական ընտրական հանձնաժողովի տվյալները, ըստ որոնց՝ հաղթել է իշխող «Նոր Ադրբեջան» կուսակցությունը։ Խորհրդարանի 125 տեղի համար պայքարել է 990 թեկնածու, որոնցից 305-ը՝ 25 քաղաքական կուսակցություններից, 684-ը՝ ինքնառաջադրված, 1 թեկնածու էլ առաջադրվել է նախաձեռնող խմբի կողմից։ Քվեարկությանը մասնակցել է 2 մլն 196 հազար 771 մարդ. մասնակցությունը կազմել է 37,27 տոկոս։

Ըստ ռուսական կողմի հաղորդագրության՝ ընտրություններին հետևել են շուրջ 12 հազար տեղական և 589 միջազգային դիտորդներ 51 կազմակերպություններից 69 երկրներից, այդ թվում՝ Ռուսաստանից։ ԱՊՀ և ՇՀԿ դիտորդական առաքելությունների գնահատականներով՝ ընտրությունները ճանաչվել են թափանցիկ, հուսալի և ժողովրդավարական՝ կազմակերպված ազգային օրենսդրության պահանջներին համապատասխան։

«Չնայած դրան՝ Արևմուտքը և նրա հետ փոխկապակցված միջազգային կառույցները հերթական անգամ արտահայտել են կողմնակալ և սուբյեկտիվ գնահատականներ, որոնք չեն համապատասխանում հանրապետության ժողովրդավարական գործընթացների իրական պատկերին։ ԵԱՀԿ/ԺՀՄԻԳ-ի միջոցով ռուսական կողմից ուղարկված դիտորդները քաղաքացիների ընտրական իրավունքների կոպիտ խախտման փաստեր չեն արձանագրել։ Ռուսական կողմը շնորհավորում է մեր ադրբեջանցի ընկերներին ժողովրդի կամարտահայտման հաջող կազմակերպման կապակցությամբ, որի արդյունքները ցույց են տալիս բնակչության լայն աջակցությունը Ադրբեջանի ղեկավարության կողմից իրականացվող քաղաքական կուրսին և սոցիալ-տնտեսական բարեփոխումներին»,- ասվում է հայտարարության մեջ։

ՌԴ ԱԳՆ-ն հույս է հայտնել է, որ սերտ և կառուցողական փոխգործակցությունը կշարունակվի Ադրբեջանի Միլլի Մեջլիսի պատգամավորական կորպուսի նոր կազմի և Ռուսաստանի Դաշնային ժողովի միջև՝ համահունչ երկու երկրների միջև դաշնակցային հարաբերություններին։

Հիշեցնենք, որ Բաքվում հրավիրված ասուլիսում ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) և Խորհրդարանական վեհաժողովի դիտորդները ներկայացրել էին ընտրությունների վերաբերյալ իրենց դիտարկումները։ Դրանց հիման վրա հայտարարություն էր տարածել նաև ԵՄ-ն։