30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԵՄ-ն հայտարարություն է տարածել Ադրբեջանում անցկացված խորհրդարանական ընտրությունների վերաբերյալ
Քաղաքականություն
03.09.2024 | 17:15
ԵՄ արտաքին գործերի և անվտանգության քաղաքականության հանձնակատարի մամուլի ծառայությունը հայտարարություն է տարածել Ադրբեջանում սեպտեմբերի 1-ին անցկացված արտահերթ խորհրդարանական ընտրությունների արդյունքների վերաբերյալ։
«Ըստ ԵԱՀԿ/ԺՀՄԻԳ ընտրությունների դիտորդական առաքելության՝ ընտրությունները տեղի են ունեցել սահմանափակող քաղաքական և իրավական միջավայրում, որը թույլ չի տվել իրական բազմակարծություն և հանգեցրել է մրցակցությունից զուրկ պայքարի։ Չնայած կանոնակարգված և, ընդհանուր առմամբ, արդյունավետ քվեարկության գործընթացին՝ նկատվել են լուրջ խախտումներ և կարևոր երաշխիքների բացթողումներ, մասնավորապես, ձայների հաշվարկի ժամանակ, ինչը հարցեր է առաջացնում գործընթացի ամբողջականության վերաբերյալ: ԵԱՀԿ/ԺՀՄԻԳ առաքելությունն այնուհետև նշել է, որ ընտրությունները տեղի են ունեցել այլախոհ ձայների շարունակական ճնշումների ֆոնին»,- ասվում է հայտարարության մեջ։
Եվրամիությունը կոչ է անում Ադրբեջանի իշխանություններին ընդունել և իրականացնել ԵԱՀԿ/ԺՀՄԻԳ-ի առաջարկությունները այս և նախորդ ընտրությունների հետ կապված։ ԵՄ-ն պատրաստ է աջակցել այդ գործընթացին։
Նշենք, որ նախօրեին Բաքվում հրավիրված ասուլիսում ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) և Խորհրդարանական վեհաժողովի դիտորդները ներկայացրել էին ընտրությունների վերաբերյալ իրենց դիտարկումները։
Հիշեցնենք, որ ընտրությունների արդյունքներով՝ Ադրբեջանի նախագահ Իլհամ Ալիևի ղեկավարած «Նոր Ադրբեջան» կուսակցությունը Մեջլիսում ստանում է մեծամասնություն՝ 68 մանդատ 125-ից։
