22.06.2026 | 15:28
Կարող է իր ներողություններն իրեն պահել․ Զելենսկին Լուկաշենկոյից «կոնկրետ քայլեր» է պահանջում
Էրդողանն ընդունել է Կազանում ԲՐԻԿՍ-ի գագաթնաժողովին մասնակցելու՝ ՌԴ-ի հրավերը
Քաղաքականություն
03.09.2024 | 16:49
Թուրքիայի նախագահ Ռեջեփ Թայիփ Էրդողանն ընդունել է ՌԴ իշխանությունների հրավերը՝ մասնակցելու Կազանում կայանալիք ԲՐԻԿՍ-ի գագաթնաժողովին։ Այս մասին հայտնել է ՌԴ նախագահ Վլադիմիր Պուտինի օգնական Յուրի Ուշակովը, գրում է «Ինտերֆաքս»-ը։
«Առաջարկը թուրքական կողմին փոխանցվել է, Էրդողանն այն ընդունել է»,- ասել է Ուշակովը։
Նախօրեին էլ ՌԴ նախագահի խոսնակ Դմիտրի Պեսկովն ասել էր, որ Վլադիմիր Պուտինի Թուրքիա այցի ժամկետները դեռ համաձայնեցված չեն, աշխատանքները շարունակվում են։
Միաժամանակ, Bloomberg գործակալությունը, վկայակոչելով իր աղբյուրներին, հայտնել էր, որ Թուրքիան պաշտոնապես դիմել է միանալու զարգացող տնտեսությունների ԲՐԻԿՍ-ի խմբին, քանի որ ձգտում է մեծացնել իր համաշխարհային ազդեցությունը և նոր կապեր հաստատել ավանդական արևմտյան դաշնակիցներից դուրս:
ԲՐԻԿՍ-ի հիմնադիր երկրներն են Բրազիլիան, Ռուսաստանը, Հնդկաստանը, Չինաստանն ու Հարավային Աֆրիկան։ Ներկայում կազմակերպությունը ներառում է 9 պետություն՝ Բրազիլիա, Ռուսաստան, Հնդկաստան, Չինաստան, Հարավային Աֆրիկա, Եգիպտոս, Իրան, Եթովպիա և Արաբական Միացյալ Էմիրություններ։
Կազմակերպության գագաթնաժողովն անցկացվելու է 2024 թվականի հոկտեմբերի 22-24-ը Կազանում։
