Պակիստանից Ադրբեջանի պատվիրած JF-17 կործանիչները համալրված կլինեն թուրքական հրթիռներով

Պակիստանից Ադրբեջանի պատվիրած JF-17 Block III կործանիչները համալրվելու են թուրքական պաշտպանական արդյունաբերության կողմից արտադրված Bozdoğan և Gökdoğan «օդ-օդ» հրթիռներով։ Այս մասին հայտնում են ադրբեջանական լրատվամիջոցները՝ վկայակոչելով թուրքական Centry Defense-ին։

Թուրքական TÜBİTAK SAGE պաշտպանական կորպորացիան իրավունք է ստացել ինտեգրել իր Gökdoğan և Bozdoğan հրթիռներն այդ կործանիչների վրա։ Դրանք համալրվելու են նաև թուրքական առաջատար ավիոնիկայով։

Հավելենք, որ այս տարվա փետրվարին տեղեկություններ էին տարածվել, որ Ադրբեջանի ռազմաօդային ուժերն ու Պակիստանի ավիացիոն համալիրը պայմանագիր են կնքել, որը կդառնա ասիական երկրի պատմության մեջ ամենամեծը։ Պայմանագրի համաձայն՝ Ադրբեջանը ձեռք է բերելու JF-17C Block-III կործանիչներ, ինչպես նաև ռեակտիվ ինքնաթիռների ուսումնական և մարտական ​​ զինամթերք։ Համաձայնագրի արժեքը գնահատվում է 1,6 մլրդ դոլար։

JF-17-ը համարվում է «4+» սերնդի կործանիչ, մարտական ​​ինքնաթիռն օգտագործում է հինգերորդ սերնդի ավիոնիկա և զենք:

Դեռևս 2021 թվականի վերջին տեղեկություններ էին տարածվել, որ Բաքուն հետաքրքրված է պակիստանյան կործանիչներով։ Մասնավորապես, այդ մասին հայտարարել էր Իսլամաբադում Ադրբեջանի դեսպանատան ռազմական կցորդ Մեհման Նովրուզովը։

«Պակիստանից JF-17 Thunder ինքնաթիռների գնումը մեր օրակարգի առանցքային կետն է»,- ասել էր նա՝ հավելելով, որ Ադրբեջանն աշխատում է Պակիստանի հետ իր ռազմաօդային ուժերի արդիականացման ուղղությամբ և մտադիր է գնել JF-17 կործանիչի Block-III մոդիֆիկացիան, որում արդիականացված են խցիկի էլեկտրական և ռադարային համակարգերը։

Այս տարվա հուլիսին էլ Ադրբեջանի նախագահ Իլհամ Ալիևը երկօրյա պետական այցով Պակիստանում էր: Կողմերը քննարկել էին պաշտպանական արդյունաբերության նախագծեր։ Ալիևը Պակիստանի ռազմաօդային ուժերի Նուր Խան բազայի Իսլամաբադի Ազգային օդատիեզերական գիտատեխնիկական պարկում (NASTP) մասնակցել էր նաև ռազմական ցուցահանդեսի։

Էմմա Չոբանյան