Ալիևը կնոջ հետ այցելել է Դադիվանք

Ադրբեջանի նախագահ Իլհամ Ալիևը կնոջ՝ Մեհրիբան Ալիևայի հետ այսօր այցելել է Քարվաճառ։ Ադրբեջանական լրատվամիջոցների հաղորդմամբ՝ նրանք այցելել են հայկական Դադիվանք վանական համալիրը։

Նշենք, որ հայկական  միջնարդարյան վանական համալիրի հետ կապված պաշտոնական Բաքուն քարոզչական կեղծ արշավ է իրականացնում՝ այն փորձելով ներկայացնել աղվանական։

Շարունակելով հայկական հետքերը վերացնելու և յուրացնելու քաղաքականությունը՝ Ադրբեջանի  մշակույթի նախարար Ադիլ Քերիմլին Ալիևիներին է ներկայացրել հայկական վանական համալիրի պատմությունը՝ ամբողջությամբ խեղաթյուրելով իրականությունը։ Նա ասել է, թե վանական համալիրը, իբր, «1990-2020 թվականներին ենթարկվել է հայերի հարձակմանը», և Հայ առաքելական եկեղեցու ու Հայաստանի  աջակցությամբ այնտեղ իրականացվել են ռեստավրացիոն աշխատանքներ։ Քերիմլին ասել է, թե, իբր, «կեղծիքի նշաններ են ավելացվել, իսկ հուշարձանների բազմաթիվ հատվածներ ենթարկվել են վանդալիզմի», վանքում մնացած հայ քահանաներն ու վանականներն օտարերկրյա մասնագետների մասնակցությամբ կոտրել են հուշարձանների հնագույն որմնանկարներն ու ապօրինաբար հեռացրել դրանք Ադրբեջանի տարածքից»։

Նշվել է, որ 2020 թվականի դեկտեմբերին Երևանում կայացած ցուցահանդեսում «ապօրինի» կերպով ցուցադրվել են զանգեր, քարե արձանագրություններ, որմնանկարներ, գորգեր և, իբր, «Ադրբեջանին պատկանող մշակութային ժառանգության այլ նմուշներ», Ավելի ուշ էլ վանքի որմնանկարները որպես «Հայկական ավանդական արվեստի օրինակներ» ներկայացվել են Իտալիայի Պադուայում բացված «Որմնանկարները հայկական քրիստոնեական եկեղեցիներում VII-XIII դդ» խորագրով ցուցահանդեսում։ Այն կազմակերպվել է նաև Իտալիայի մի քանի այլ քաղաքներում։

Հաղորդվում է, որ Ալիևներն այնուհետև մասնակցել են 22,5 ՄՎտ հզորությամբ հիդրոէլեկտրակայանի բացմանը, բնակելի երկրորդ համալիրի հիմնարկեքի արարողությանը։ Ալիև ամուսինները ծանոթացել են 524 ընտանիքի համար նախատեսված բնակելի համալիրի կառուցման աշխատանքներին, հանքային ջրերի գործարանի ու մի շարք այլ օբյեկտների բացման։

Մեհրիբան Ալիևան սոցցանցերում կադրեր է հրապարակել այցից։