Անկարան Դամասկոսի հետ հարաբերությունների կարգավորման պայմաններ է առաջադրել

Անկարան Դամասկոսի հետ հարաբերությունները կարգավորելու չորս պայման է առաջադրել՝ հայտարարելով, որ թուրքական զինված ուժերը չեն լքի այդ երկիրը, եթե դրանք չկատարվեն։ Այս մասին հայտնում է CNN Türk հեռուստաալիքը՝ վկայակոչելով Թուրքիայի մայրաքաղաքի դիվանագիտական աղբյուրները։

Ավելի վաղ Սիրիայի նախագահ Բաշար ալ-Ասադը, ելույթ ունենալով նոր գումարման խորհրդարանի նիստում, ասել էր, որ միջնորդները՝ ի դեմս Ռուսաստանի, Իրանի և Իրաքի, անկեղծ փորձեր են արել հաշտեցնել Սիրիային և Թուրքիային, սակայն այս նախաձեռնության հարցում առաջընթաց չկա։

«Ըստ ԱԳՆ աղբյուրների՝ հարաբերություններն այն մակարդակին վերադարձնելու ճանապարհը, որը կար մինչև 2011 թվականը, անցնում է չորս հիմնական պայմաններով: Այսինքն՝ Թուրքիան չորս հիմնական ակնկալիք ունի հարաբերությունների կարգավորումից»,- հաղորդում է հեռուստաալիքը:

Աղբյուրի տվյալներով՝ Անկարան, առաջին հերթին, ակնկալում է, որ Դամասկոսն ամբողջությամբ կազատվի ահաբեկչական տարրերից՝ տարածքային ամբողջականությունն ու միասնությունը պահպանելու համար։

«Երկրորդ՝ Սիրիան պետք է հասնի իսկական ազգային հաշտեցման սեփական ժողովրդի հետ՝ հիմնված իր ժողովրդի օրինական պահանջների և ակնկալիքների վրա՝ ՄԱԿ-ի Անվտանգության խորհրդի 2254 բանաձևի շրջանակում, վերադառնա սահմանադրական բանակցություններին և համաձայնության գա ընդդիմության հետ։ Երրորդ՝ փախստականների անվտանգ և արժանապատիվ վերադարձի համար անհրաժեշտ պայմաններ ստեղծի։ Եվ չորրորդ՝ ապահովի ընդդիմության վերահսկողության տակ գտնվող տարածքներին մարդասիրական օգնության անխափան մատակարարումը»,- նշել է հեռուստաալիքը։