Բորելը Գազայում եռօրյա հրադադարի կոչ է արել՝ պոլիոմելիտի դեմ պատվաստումներ կատարելու համար

ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Ժոզեպ Բորելը կոչ է արել եռօրյա հրադադար հաստատել Գազայի հատվածում։ Այդ ընթացքում անհրաժեշտ է երեխաներին պատվաստել պոլիոմելիտի դեմ։ Ավելի քան 640 հազար երեխա պետք է պատվաստվի։

«Պոլիոմիելիտի արագ տարածումը սպառնում է Գազայի երեխաներին, որոնք արդեն թուլացել են տեղահանության և թերսնման պատճառով: Կոչ եմ անում Գազայի հատվածում անհապաղ եռօրյա հրադադար հաստատել, որպեսզի ԱՀԿ-ն և ՅՈՒՆԻՍԵՖ-ը պատվաստումներ կատարեն՝ անկախ մյուս բանակցություններից»,- գրել է Բորելը X սոցիալական ցանցում։

Գազայի հատվածում պոլիոմիելիտի առաջին հաստատված դեպքը տասը ամսական երեխայի մոտ է գրանցվել։ ՄԱԿ-ը պոլիոմիելիտի պատվաստանյութ է մատակարարել անկլավի 1,255 միլիոն մարդու համար: Օգոստոսի 27-ին կազմակերպությունը հայտարարել է հետագա մարդասիրական գործունեությունը դադարեցնելու մասին՝ Դեյր ալ-Բալահ քաղաքի մի քանի շրջանների տարհանման՝ Իսրայելի հրամանի պատճառով։ Այս քաղաքում ՄԱԿ-ը համակարգում էր անձնակազմի աշխատանքների մեծ մասը։

Հուլիսի վերջին Պաղեստինի Առողջապահության նախարարությունը հայտարարեց Գազայի հատվածում պոլիոմիելիտի համաճարակի մասին։ Գերատեսչությունը միջադեպի համար մեղադրել է Իսրայելին, քանի որ տեղի բնակիչների կենցաղային պայմանները, ներառյալ՝ խմելու ջրի բացակայությունը, ազդել են վարակի տարածման վրա։