11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
ԱՄՆ-ը չի պատերազմում Ռուսաստանի հետ, այլ Ուկրաինային պաշտպանվելու հնարավորություն է տալիս․ Պենտագոն
Քաղաքականություն
28.08.2024 | 13:22
Պենտագոնի խոսնակը հայտարարել է ԱՄՆ-ի անփոփոխ քաղաքականության մասին՝ կապված ռուսական տարածքի վրա հարձակումներ իրականացնելու համար ուկրաինացիների կողմից ամերիկյան զենքի օգտագործման հետ, գրում է VOA-ն։
Գեներալ-մայոր Պատրիկ Ռայդերը մեկնաբանել է Ռուսաստանի և Ուկրաինայի միջև ռազմական հակամարտությունը՝ ընդգծելով, որ ԱՄՆ-ը դրան չի մասնակցում։
«Մենք Ռուսաստանի հետ պատերազմի մեջ չենք։ Մենք չենք ձգտում հակամարտության Ռուսաստանի հետ։ Մենք պարզապես աջակցում ենք ժողովրդավարական երկրին և [ուկրաինացիներին] հնարավորություն ենք տալիս պաշտպանվելու»,- ասել է Ռայդերը։
Նա հավելել է, որ Պենտագոնի քաղաքականությունը ռուսական տարածքին հարվածելու համար ամերիկյան զենքի օգտագործման վերաբերյալ չի փոխվել։
«Ուկրաինացիները կարող են օգտագործել ԱՄՆ անվտանգային աջակցությունը՝ պաշտպանվելու միջսահմանային հարձակումներից, այսինքն՝ պատասխան կրակի համար։ Բայց ինչ վերաբերում է Ռուսաստանի դեմ հեռահար, խորը հարվածներին, ապա մեր քաղաքականությունը չի փոխվել»,- ընդգծել է Պենտագոնի ներկայացուցիչը։
Ուկրաինայի նախագահ Վլադիմիր Զելենսկին երկուշաբթի կրկին կոչ էր արել արևմտյան երկրներին վերացնել Ռուսաստանի տարածքի վրա հարձակումների համար հեռահար զենքի օգտագործման սահմանափակումները։ Հայտարարությունը հնչել է այն բանից հետո, երբ Ռուսաստանը երկուշաբթի գիշերը լայնածավալ հարվածներ է հասցրել Ուկրաինային՝ օգտագործելով հարյուրից ավելի հրթիռներ և գրեթե հարյուր անօդաչու թռչող սարքեր: Հարվածների թիրախ են դարձել քաղաքացիական բնակչության համար կարևոր ենթակառուցվածքները:
