Ուկրաինային տրամադրվող ռազմական օգնությունը կրճատելու՝ Գերմանիայի պլանները տագնապալի նորություն են. Բորել

ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը Ուկրաինային ռազմական օգնությունը նվազեցնելու՝ Գերմանիայի պլանների մասին լուրերն անվանել է «վատ» և «տագնապալի», գրում է VOA-ն։

Գերմանիան ԱՄՆ-ից հետո Ուկրաինային երկրորդ ամենամեծ օգնություն տրամադրողն է։

Այնուամենայնիվ, Գերմանիայի 2025 թվականի դաշնային բյուջեի նախագիծը, որը երկար բանավեճի առարկա է դարձել իշխող կոալիցիայի երեք կուսակցությունների միջև, ներառում է ընդամենը շուրջ 4 միլիարդ եվրո (4,4 միլիարդ դոլար) Ուկրաինայի համար: 2024 թվականին այս գումարը կազմում էր մոտավորապես 8 միլիարդ եվրո։

«Հայտարարությունը, որ Գերմանիան կնվազեցնի իր ռազմական աջակցությունն առաջիկա մի քանի տարիների ընթացքում, վատ նորություն է։ Մինչ այժմ Ուկրաինային ամենանշանակալի օգնությունը տրամադրել է Գերմանիան։ Այսպիսով, մենք կարող ենք ասել, որ հիմա մենք պետք է այլ բան անենք: Բայց առայժմ այն, ինչ մենք անում ենք [Ուկրաինային օգնություն ցուցաբերելը], հիմնականում Գերմանիան է անում»,- ասել է Բորելը Իսպանիայի Սանտանդեր քաղաքում կայացած համաժողովում:

Ստեղծված իրավիճակում Գերմանիայի կառավարությունը հայտարարել է, որ հույսը դնելու է G7-ի և Եվրամիության կողմից ռուսական սառեցված ակտիվների օգտագործման պլանների վրա։

Հունիսին «Մեծ յոթնյակի» առաջնորդները համաձայնեցին Ուկրաինային 50 միլիարդ դոլարի վարկ տրամադրել՝ օգտագործելով այդ ակտիվներից ստացված շահույթը:

Ներկայում քննարկման փուլում է Գերմանիայի 2025 թվականի դաշնային բյուջեն։