30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ուկրաինայի ԱԳՆ-ն՝ Կուրսկում գրոհի մասին
Քաղաքականություն
13.08.2024 | 19:15
Ուկրաինան շահագրգռված չէ Ռուսաստանի Կուրսկի մարզում տարածքներ գրավելով, բայց ցանկանում է պաշտպանել իր ժողովրդի կյանքը՝ թույլ չտալով Ռուսաստանին լրացուցիչ ստորաբաժանումներ տեղափոխել Դոնեցկի մարզ և դժվարացնելով ռուսական զորքերի նյութատեխնիկական ապահովումը։ Այս մասին հայտարարել է Ուկրաինայի ԱԳՆ ներկայացուցիչ Գեորգի Տիխին։
«Ի տարբերություն Ռուսաստանի Դաշնության՝ Ուկրաինային ուրիշինը պետք չի։ Ուկրաինան շահագրգռված չէ Կուրսկի մարզում տարածքներ գրավելու հարցում, մենք ցանկանում ենք պաշտպանել մեր ժողովրդի կյանքը»,- ասել է Տիխին Կիևում կայացած ճեպազրույցում, փոխանցում է BBC-ի ռուսական ծառայությունը։
Նա նշել է, որ Կուրսկի շրջանից միայն ամռան սկզբից ավելի քան 2 հազար հարված է հասցվել Ուկրաինայի սահմանամերձ Սումիի շրջանին, կիրառվել է 255 կառավարվող ռումբ և 100-ից ավելի հրթիռ։
«Ցավոք, Ուկրաինան չունի բավարար հնարավորություն հեռահար հարվածներ հասցնելու այն սպառազինություններին, որոնք առկա են, որպեսզի պաշտպանվի այդ ահաբեկչությունից։ Չկան դեռևս այդ որոշումները, որոնց հույսը մենք ունենք։ Ուստի, անհրաժեշտություն կա ուկրաինական զինված ուժերի օգնությամբ ազատել սահմանամերձ այս տարածքները Ուկրաինային հարվածող ռուսական ռազմական կոնտինգենտներից»,- ընդգծել են Ուկրաինայի ԱԳՆ-ում։
ԱԳՆ խոսնակը նշել է, որ Կիևը «համապատասխան նպատակներին» է հասնում Կուրսկի մարզում և կշարունակի դա անել, քանի որ դա անհրաժեշտ է երկրի անվտանգության և պաշտպանության համար։
Տիխին հավելել է նաև, որ Կուրսկի շրջանում իրականացվող գործողությունը Ռուսաստանին թույլ չի տալիս լրացուցիչ ստորաբաժանումներ ուղարկել Դոնբաս՝ բարդացնելով նյութատեխնիկական ապահովման աշխատանքները։
