30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԱՄՆ-ը Թուրքիային խնդրում է համոզել Իրանին՝ նվազեցնել լարվածությունը Մերձավոր Արևելքում
Քաղաքականություն
13.08.2024 | 17:16
ԱՄՆ կառավարությունը կոչ է անում իր բոլոր դաշնակիցներին ազդել Իրանի վրա՝ Մերձավոր Արևելքում լարվածությունը նվազեցնելու համար։ Թուրքիայում ԱՄՆ դեսպան Ջեֆ Ֆլեյքի խոսքով՝ դա վերաբերում է նաև Անկարային։ Նա ասել է, որ թուրքական իշխանություններն ամեն ինչ անում են էսկալացիան կանխելու համար, գրում է Reuters-ը։
«Մենք խնդրում ենք մեր բոլոր դաշնակիցներին, ովքեր հարաբերություններ ունեն Իրանի հետ, այդ թվում՝ Թուրքիային, համոզել նրան՝ գնալ ապաէսկալացիայի»,- ասել է դեսպանը Ստամբուլում լրագրողների հետ ճեպազրույցում։
Նա հավելել է, որ Թուրքիայի ներկայացուցիչները վստահ են, որ տարածաշրջանում էսկալացիա չի լինի։ Դիվանագետի խոսքով՝ այժմ Թուրքիայի և ԱՄՆ-ի հարաբերություններն «ավելի լավ վիճակում են, քան երբևէ նախկինում»:
Այսօր ավելի վաղ ԱՄՆ-ի, Մեծ Բրիտանիայի, Գերմանիայի, Իտալիայի և Ֆրանսիայի ղեկավարները բանակցություններից հետո Իրանին կոչ են արել զերծ մնալ Իսրայելի հետ հակամարտությունը սրելուց։ Ի պատասխան՝ Իրանի ԱԳՆ-ն հայտարարել է, որ այս կոչը «զուրկ է քաղաքական տրամաբանությունից» և հակասում է միջազգային իրավունքի սկզբունքներին։
Իրանը խոստացել է մեծ հարված հասցնել Իսրայելին՝ ի պատասխան հուլիսի 31-ին Թեհրանում ՀԱՄԱՍ-ի քաղբյուրոյի ղեկավար Իսմայիլ Հանիեի սպանության: Ըստ Axios-ի՝ հարձակումը կարող է տեղի ունենալ մոտ օրերս։
Իսրայելի բանակի խոսնակ Դանիել Հագարին ասել է, որ Իսրայելի պաշտպանության բանակը «պատրաստվածության բարձր մակարդակի է բերված»։
